इक्यान पूर्वाञ्चल शाखाले वृक्षारोपण र विद्यार्थीलाई सहयोग गर्दै मनायो २९औँ वार्षिकोत्सव

इटहरी। नेपाल शैक्षिक परामर्श सङ्घ (इक्यान) पूर्वाञ्चल शाखाले आफ्नो २९औँ वार्षिकोत्सव विभिन्न सामाजिक गतिविधिसहित मनाएको छ।

वार्षिकोत्सवको अवसरमा इक्यानले मोरङको सुन्दरहरैचा नगरपालिका–३ स्थित श्री शेषनारायण दिव्य धाम आचार्य सेवा गुरुकुलका विद्यार्थीहरूलाई खाद्यान्न, स्टेशनरी र लत्ता कपडा वितरण गरी सहयोग प्रदान गरेको छ। सो अवसरमा ५०० भन्दा बढी बिरुवा रोपेर संस्थाले वातावरण संरक्षणमा पनि योगदान दिएको कार्यक्रमका संयोजक गोपाल निरौलाले जानकारी दिए । 

कार्यक्रम इक्यान पूर्वाञ्चल शाखाका अध्यक्ष रवीन्द्र निरौलाको अध्यक्षतामा सम्पन्न भएको थियो। कार्यक्रममा संस्थाका निवर्तमान अध्यक्ष प्रकाश लकान्द्री, प्रमुख सल्लाहकार कमल तिमिल्सीना र संस्थापक सचिव भीम लिगंथेपले वार्षिकोत्सवको महत्त्व र संस्थाको सामाजिक उत्तरदायित्वबारे विचार व्यक्त गरेका थिए। सचिव दुर्लभ कार्कीले सो कार्यक्रम सञ्चालन र सहजीकरण गरेका थिए।

आयोजक इक्यानले यस किसिमका सामाजिक उत्तरदायित्वमुखी कार्यक्रमहरू निरन्तर अघि बढाउने प्रतिबद्धता व्यक्त गरेको छ। संस्थाले शिक्षा, सामाजिक सेवा र वातावरण संरक्षणका क्षेत्रमा आफ्नो सक्रिय भूमिका निरन्तर निभाउँदै आएको छ।