सुनसरी ३ बाट केपी ओली पक्षका शीर्ष पदाधिकारी नै पराजित, इस्वर पोखरेल पक्ष हावी

सुनसरी : नेकपा एमालेको मङ्सिर २७ देखि २९ गतेसम्म काठमाडौँमा हुने ११औँ महाधिवेशनका लागि सुनसरी ३ मा एमाले महाधिवेशनको प्रतिस्पर्धाबाट प्रतिनिधि छनोटमा केपी शर्मा ओली पक्षका प्रभावशाली जिल्लागत पदाधिकारीहरू नै पराजित भएका छन् ।

सुनसरीका ४ मध्ये हालसम्म मतगणना सम्पन्न भएको क्षेत्र नं. ३ मा एमाले जिल्ला उप–सचिव यामकुमार शुब्बा भारी मतान्तरले पराजित भएका हुन्। शुब्बा यसअघि इटहरी उपमहानगरका मेयर उम्मेदवारसमेत रहेर पराजित भएका थिए। शनिवार भएको मतदानमा उनले ५५१ मत मात्र पाए।

यस क्षेत्रमा ईश्वर पोखरेल पक्षले मजबुत उपस्थिति जनाउँदै विजय सुनिश्चित गरेको छ। पूर्व प्रदेशसभा सदस्य ईश्वर पोखरेल नजिकका नेता लिलम बस्नेत, केशव रिमाल र फरिदा राई विजयी भएका छन्। त्यस्तै, विद्या भण्डारी पक्षकी विष्णु शर्मा नेपाल पनि प्रतिनिधि रूपमा चयन भएकी छन्।

झन्डै २ हजार मतदाता रहेको सुनसरी–३ मा ओली पक्षबाट इटहरी १३ का पूर्व वडाध्यक्ष शिवनारायण चौधरी मात्रै विजयी भएका छन्। जिल्लाका चारवटै क्षेत्रमध्ये तीन क्षेत्रमा नेताहरूले सशक्त प्यानल बनाएर चुनावी प्रतिस्पर्धा गरेका थिए।

यता सुनसरी क्षेत्र नं. २ मा आन्तरिक मामिला तथा कानुनमन्त्री रेवतिरमण भण्डारी समेत प्रतिनिधि चयनका लागि चुनावी मैदानमा उत्रिएका छन्। उनी पनि ओली निकट नेताका रूपमा मानिन्छन्। ईश्वर पोखरेल समूहबाट डेगराज फुयाँल, खेमराज पोखरेल र लोकेश निरौला पनि प्रतिस्पर्धामा छन्।