एमाले प्रतिनिधि छनोटमा सचिवदेखि सांसदसम्म पराजित : आफ्नै सङ्गठित सदस्यले समेत नपत्याएका नेता (नामावलीसहित)

इटहरी : नेकपा एमालेको आसन्न ११औँ महाधिवेशनका लागि शनिवार सम्पन्न प्रतिनिधि छनोटमा सुनसरीका प्रभावशाली नेता, पदाधिकारीदेखि प्रदेश सभा सांसदसम्म पराजित भएपछि पार्टीभित्र शक्तिसन्तुलननै फेरिएको सङ्केत देखिएको छ।

विशेषगरी पार्टी अध्यक्ष केपी शर्मा ओलीको प्यानलका नेताहरू एकपछि अर्को हार्दै जाँदा उनीहरू महाधिवेशनमा मताधिकारसमेत गुमाउने स्थितिमा पुगेका छन्।

सुनसरी क्षेत्र नं. १ मा प्रदेश सभा सदस्य तथा पूर्व जिल्ला अध्यक्ष रमेश बस्नेत शक्तिशाली ओली पक्षधर मानिन्थे। तर, उनी प्रतिस्पर्धामा पराजित भए। ओली प्यानलकै धरान नगर इन्चार्ज तथा प्रदेश सभा सदस्य विजय राईले पनि हार बेहोरे।

प्रदेश कमिटी सदस्य प्रकाश राई, लहरुमाया जिमी र राजेन्द्र कार्की पनि विजयी हुन सकेनन्। करिब ३,८०० मतदाता दर्ता भएको ठाउँमा आधाभन्दा कम मत खसेको तथ्यले एमालेभित्र गहिरिँदो निराशा र गुट–उपगुटको प्रभाव झनै स्पष्ट देखिएको छ।

यसै क्षेत्रमा इस्वर पोखरेल पक्षका पूर्व सङ्घीय सांसद जयकुमार राई विजयी बने। पोखरेल निकट कोशी प्रदेश सदस्य सुशीला पहारीले पनि जित दर्ता गरिन्। ओली पक्षधर मुरारी सुबेदी, आशाराम चौधरी, दिवस राई र सिता भण्डारी यस क्षेत्रका अन्य विजयी हुन्।

समग्रमा सुनसरी–१ बाट ६ प्रतिनिधि चयन भए। सुनसरी–२ को नतिजाले झनै ठुलो तरङ्ग ल्यायो। यहाँ जिल्ला सचिव राम कोइराला, रामधुनी नगरपालिकाका मेयर शंकरलाल चौधरी, उपमेयर तारा थापा र रामप्रसाद चौलागाईं सबै पराजित भए।

पूर्व जिल्ला सदस्य कमला खड्का, मिथिला पोखरेल, गायत्री लम्साल, केदार न्यौपाने, सिर्जना नेपाली र भीमाकुमारी तुम्बाहाम्फे पनि हारको सूचीमा परे।

यो पनि : एमाले महाधिवेशन : सुनसरी–२ मा जिल्ला सचिवसहित मेयर–उपमेयर नै पराजित

एमाले सङ्गठनमा लामो समयदेखि स्थापित मानिएका यी नेताहरूको सामूहिक पराजयले सुनसरी–२ लाई ‘सबैभन्दा ठुलो राजनीतिक धक्का’ मानिएको छ। 

सुनसरी–३ मा जिल्लाका उपसचिव यामकुमार सुब्बा समेत पराजित भए। यस क्षेत्रमा पनि ओली पक्षका मुख्य संरचनात्मक पदाधिकारीहरूलाई नेतृत्वले सुरक्षित राख्न नसकेको आलोचना पार्टीभित्रै उठिरहेको छ।

सुनसरी–४ मा भने लस्करी अन्सारी नेतृत्वको प्यानलले उत्कृष्ट प्रदर्शन गर्‍यो। खुला तर्फ दुई प्रतिनिधिका लागि सात जनाबीच प्रतिस्पर्धा हुँदा लस्करी अन्सारी र श्यामकुमार भण्डारी विजयी भए। यो क्षेत्र ओली पक्षका लागि अपेक्षाकृत सहज रह्यो।

चारै क्षेत्रमा प्रभावशाली नेता, प्रदेश सांसद तथा संरचनात्मक पदाधिकारीसम्म पराजित भएपछि ‘ओली प्यानल कमजोर हुँदै गएको’ विश्लेषण पार्टीभित्र तीव्र रूपमा चल्दै छ।

सङ्गठित सदस्यहरूबीच मतप्रतिको उदासीनता, गुटगत प्रतिद्वन्द्व र नेतृत्वप्रतिको असन्तुष्टि चुनावी नतिजामा प्रत्यक्ष झल्किएको देखिन्छ।

 सुनसरीमा जम्मा २५ जना प्रतिनिधिका लागि गरिएको निर्वाचनमा कुल ११ हजार ९ सय ३७ मत सङ्ख्या रहेका थिए । जसमा ६५ प्रतिशत मात्र मत झरेको थियो ।

यसपटक सुनसरीमा भएको अप्रत्याशित पराजय–शृङ्खलाले एमालेको मङ्सिर २७–२९ मा काठमाडौँमा हुने महाधिवेशनलाई थप रोचक बनाएको राजनीतिक विश्लेषकहरूको टिप्पणी छ।