इटहरीमा खुल्यो २ अर्ब लगानीमा होटल सोल्टी वेस्टेन्ड, अन्तर्राष्ट्रिय सुविधा दिने दाबी

इटहरी । इटहरीको हलगडामा रहेको ‘सोल्टी वेस्टेन्ड होटल’ भोलि बुधबारबाट सञ्चालनमा आउने भएको छ । आज पत्रकार सम्मेलन गरी होटल सञ्चालनमा आउने जानकारी गराइएको हो । करिब २ अर्ब लगानीमा निर्माण गरिएको होटलमा ८० वटा सुविधायुक्त कोठा छन् । २०७२ सालदेखि निर्माण सुरु गरिएको होटललाई गरिमा होटल नाम दिइएको थियो । १ वर्षअघि सोल्टी होटलसँग सहकार्य भएपछि उक्त होटललाई 'सोल्टी वेस्टेन्ड' नाम दिइएको हो । पत्रकार सम्मेलनमा बोल्दै होटलका अध्यक्ष भीमबहादुर पौडेलले यो होटलले इटहरीको व्यावसायिक र पर्यटकीय गतिविधि विकासमा भूमिका खेल्ने बताए । ‘हामीले विशेषगरी विदेशी पाहुनालाई लक्षित गरेका छौं । अध्यक्ष पौडेलले भने ‘इटहरीमा धेरै मेनपावर छन्, त्यहाँ कामदारको अन्तरवार्ता लिन विदेशी आउने गरेका छन् । तर उनीहरु बस्नकै लागि विराटनगर, विराटचौक पुग्नु पर्ने अवस्था छ । ती पाहुनालाई इटहरी नै राख्ने छौँ ।’ होटलका उपाध्यक्ष सुदर्शन चापागाईले होटलले अन्तर्राष्ट्रिय स्तरको सेवा उपलब्ध गराउने जानकारी दिए । होटलमा स्वीमिङपुल, साउना, स्पा, कार्यक्रम तथा सेमिनार हल, फिटनेस सेन्टरलगायतका सुविधा छ । होटलले उद्घाटनको अवसरमा विशेष छुट सुविधा समेत दिएको छ । कोशी प्रदेशमा फाइभ स्टार मध्ये तेश्रो होटल हो । यसअघि झापामा २ वटा सञ्चालनमा आइसकेका छन् ।