विज्ञान र प्रविधिसम्बन्धी कार्यशाला सम्पन्न

इलाम । इलाम नगरपालिका १० गोदकमा रहेका पूर्ण स्मारक मावि र नन्द माविका विद्यार्थीका लागि सञ्चालित १० दिने 'स्टिम कार्याशाला' समापन भएको छ । विज्ञान प्रदर्शनी सम्बन्धी कार्यक्रममा ग्रिड भिल कार्यक्रम अन्तरगत काठमाडौं विश्वविद्यालयका इन्जीनियरहरुको सहजीकरणमा कार्यशाला आयोजना गरिएको थियो । इलाम नगरपालिका १० गोदकको वडा शिक्षा समितिले आयोजना गरेको कार्यशालामा विज्ञान सम्बन्धी ज्ञान दिइएको थियो । तालिमपछि सहभागी विद्यार्थीहरुले विभिन्न प्रकारका उपकरणहरु निर्माण गर्न सक्ने भएका छन् । उनीहरुले हाइड्रो इलेक्ट्रिक प्रोजेक्ट, टर्बाइन इलेक्ट्रिक प्रोजेक्ट, पानी जहाज लगायतका उपकरण निर्माण गरेका छन् । निर्माण भएका सामग्रीहरु मापनको अवसरमा प्रदर्शनी गरिएको सचिव रविन्द्र घिमिरेले जानकारी दिए । वडा शिक्षा समितिका अध्यक्ष तथा वडा अध्यक्ष ओमनाथ प्रधानको अध्यक्षतामा सम्पन्न कार्यक्रममा वडा सदस्य, शिक्षा समितिका सदस्य तथा सम्बन्धित विद्यालयका शिक्षक एवम् विद्यार्थीहरुको सहभागिता थियो । सहजकर्ता एवम् इन्जिनियर असिम जोशीले आफ्नो जन्मथलो, आफुले अध्ययन गरेको विद्यालयमा आएर आफुले जानेको ज्ञान सिकाउन पाउँदा खुशी लागेको बताए । उनले किताबमा सिकेको कुरालाई व्यवहारमा लागू गराएर देखाउन पाएको समेत बताएका थिए । नन्द माविका प्रधानाध्यापक उमेश बुढाथोकीले विद्यार्थीहरुले सिकेको कुरालाई ब्यवहारमा उतार्न समेत प्रोत्साहन गर्नुपर्ने बताए । पूर्ण स्मारक माविका प्रधानाध्यापक प्रेमप्रसाद घिमिरेले सानैदेखि विद्यार्थीलाई प्राविधिक ज्ञान जगाइदिनाले भोलिका दिनमा अझ उत्सुकता बढ्ने र सो सम्बन्धी खोज गर्न सक्ने बताए । नेपाल रेडक्रस सोसाइटी कोशी प्रदेश युथ सरकलको परिचालन समिति सदस्य निश्कल राईले यस्तो उत्कृष्ट कार्यक्रम वडामा संचालन गर्नु गौरवको काम भएको बताए । भोलिका दिनमा समेत शिक्षा समिति विद्यालयको शिक्षा सुधारको क्षेत्रमा निरन्तर लाग्नेमा आफू विश्वस्त रहेको बताएका थिए । वडा शिक्षा समिति अध्यक्ष तथा वडाध्यक्ष ओमनाथ प्रधानले शिक्षा क्षेत्रमा ब्यवहारिक ज्ञान गराउन आफूहरु लागि परेको बताए । उनले वर्तमान समय विज्ञान र प्रविधिको क्षेत्रमा लगानी गर्नुपर्ने, विद्यार्थीलाई आधुनिक प्रविधिको क्षेत्रमा दखखल पार्नु पर्नेमा जोड दिए । उनले सामुदायिक विद्यालयको प्रयोगशालालाई स्तरोन्नति गर्ने कार्यमा समेत आफ्नो साथ रहने बताए ।