एमाले जनप्रनिधिहरूको कारण उपभोक्ताहरूको रकम भुक्तानी दिन नसकेको इटहरीका मेयरको आरोप

इटहरी : इटहरी उपमहानगरपालिकाका मेयर हेमकर्ण पौडेलले एमाले जनप्रनिधिहरूको कारण उपभोक्ताहरूको रकम भुक्तानी दिन नसकेको आरोप लगाएका छन् । पाँच महिनादेखि बारम्बार कार्यपालिका बैठक बस्न आग्रह गर्दा पनि एमालेका जनप्रतिनिधिहरूले बस्न नमान्दा उपभोक्ताहरूको करोडौँ रुपैयाँ भुक्तानी हुन नसकेको मेयर पौडेलको भनाई छ । सोमबार (आज) राखेको कार्यपालिका बैठक बहिष्कार गरेपछि मेयर पौडेलले यस्तो आरोप लगाएका हुन् । गत असार १० गतेभित्र नगरसभा गरेर बजेट सार्वजनिक गर्नुपर्ने कानुनी बाध्यतामा पनि एमाले जनप्रतिनिधिरूले असहयोग गरेको भन्दै इटहरीलाई बन्धक बनाउन खोजेको उनले बताए । नगरपालिकासँग पैसा नभएर भुक्तानी नदिएको भन्दै हल्ला फैल्याएको भन्दै नगरपालिका सँग पैसा भएर पनि कार्यपालिका नबस्दा भुक्तानी दिन नसकेको मेयर पौडेलको भनाई छ । सोमबार दिउँसो ३ बजेलाई तोकिएको कार्यपालिका बैठकमा एमालेले बहिष्कार गरेपनि कांग्रेसका ५ जना वडाध्यक्षको उपस्थितिमा मेयर पौडेलले एमालेको असहयोग गरेको बताएका हुन । इटहरी २० का वडाध्यक्ष मणिराम श्रेष्ठले उपभोक्ताहरूले भुक्तानी नपाउँदा समस्या भइरहेको भन्दै सबै एकजुट भएर सहमतिमा काम गर्नुपर्ने सुनाए ।