सुनसरीमा २१ दिनमै पक्राउ परे दुई सय ५८ जना फरार प्रतिवादी (सूचीसहित)

इटहरी : सुनसरी प्रहरीले २१ दिनको अवधिमा दुई सय ५८ जना फरार प्रतिवादीलाई पक्राउ गरेको छ ।

सुनसरीका प्रहरी उपरीक्षक (एसपी) सुमन तिम्सिनाका अनुसार अभियानको रूपमा नै फैसला कार्यान्वयन, लागूऔषध तस्करी र कारोाबर नियन्त्रण तथा अवैध भन्सार चोरी निकासी नियन्त्रण गर्ने कार्यलाई प्राथमिकता दिएर काम गरेअनुरूप प्रतिवादीलाई पक्राउ गरिएको हो ।

पुस १ गतेदेखि पुस २१ गतेसम्म सुनसरी प्रहरीले दुई सय ५८ जना प्रतिवादीलाई पक्राउ गरेको एसपी तिम्सिनाले जानकारी दिए ।

नेपाल प्रहरी र कोशी प्रदेश प्रहरी कार्यालय विराटनगरको निर्देशन बमोजिम जिल्ला प्रहरी कार्यालय सुनसरी तथा मातहत प्रहरी कार्यालयबाट खटिएका प्रहरी टोलीले जिल्ला अदालतबाट फरार रहेका विभिन्न स्थानका प्रतिवादीलाई पक्राउ गरिएको हो ।

पक्राउ परेकाहरूलाई सुनसरी जिल्ला अदालतमा दाखिला गरिएको उनले जनाए । आगामी दिनमासमेत फैसला कार्यान्वयनलाई तीव्रता दिइने सुनसरी प्रहरीले जनाएको छ ।