सरकारले डेढ घण्टा कुर्‍यो शिक्षकहरू वार्तामा आएनन् : शिक्षामन्त्री

काठमाडौँ । आन्दोलनरत शिक्षक महासङ्घका प्रतिनिधिहरू अनुपस्थित भएपछि सरकारसँगको वार्ता स्थगित भएको छ । शुक्रवार सहरी विकास मन्त्रालयमा कार्यवाहक प्रधानमन्त्री प्रकाशमान सिंह, शिक्षा विज्ञान तथा प्रविधि मन्त्री विद्या भट्टराई, संसद्को प्रमुख सचेतक,दलका मुख्य सचेतकहरूसहितको उपस्थितिमा वार्ताको लागि आह्वान गरिएको थियो । डेढ घण्टा कुर्दा समेत शिक्षक महासङ्घ एवम् शिक्षक प्रतिनिधिहरूको अनुपस्थित भएपछि सरकारसँगको वार्ता स्थगित भएको मन्त्री भट्टराईले जानकारी दिइन् । उनले भनिन्,‘सरकार लचिलो भएर प्रस्तुत भइरहेको छ । शिक्षकका मागहरूलाई दृढताकारसाथ सम्बोधन गरेर अगाडि बढिरहेको छ । मन्त्रालय मात्र नभई सिङ्गो सरकार, संसद्को प्रमुख सचेतक,दलका मुख्य सचेतकहरूसहितको उपस्थितिमा आह्वान गरेको थियौँ तर उहाँहरू आउनुभएन । औपचारिक खबर पनि आएन । करिब डेढ घण्टा पर्खेका हौँ । उहाँहरू नआएपछि आजको बैठक स्थगित गराएका छौँ ।’ उनले शिक्षक महासङ्घ,शिक्षक प्रतिनिधिहरू सबैलाई आफैले फोन गरेर साथै मन्त्रालयबाट औपचारिक रूपमा पत्राचारसमेत गर्दा पनि वार्तामा उपस्थित नभएको बताइन् । ‘मैले शिक्षक महासङ्घ,शिक्षक प्रतिनिधिहरू सबैलाई आफैँले फोन गरेँ र आमन्त्रण गरेँ । उहाँहरूलाई फोन गरेर आमन्त्रण गरेपछि अनौपचारिक भयो भनेर हामीले मन्त्रालयको तर्फबाट एउटा पत्र पटाऔँ । सबैलाई तीन बजे उपस्थित हुन भनेका हौँ । वार्ताका लागि मन्त्रालय सधैँ खुला छ भनेर सार्वजनिक आह्वान पनि गर्‍यौँ ।’