महासंघको मतदान सकियो, मतगणनाको तयारी हुँदै

काठमाडौँ । नेपाल उद्योग वाणिज्य महासंघको निर्वाचन कार्यक्रम अन्तर्गत मतदान सम्पन्न भएको छ । मंगलबार उद्घाटन भएको साधारणसभा अन्तर्गत बुधबार मतदान भएको हो ।

महासंघमा १ वरिष्ठ उपाध्यक्ष, ३ जना उपाध्यक्ष र ५९ जना कार्यसमिति सदस्य चयनका लागि मतदान भएको हो ।

अघिल्लो कार्याकालमा वरिष्ठ उपाध्यक्ष निर्वाचित भएको व्यक्ति नै अर्को कार्यकालमा स्वतः अध्यक्ष हुने महासंघको विधान छ । वस्तुगत, जिल्ला नगर र एसोसिएटतर्फको मतदान सकिएको हो । वस्तुगत र जिल्ला नगरतर्फ शतप्रतिशत तथा एसोसिएटतर्फ १५ मत कम खसेको छ । महासंघमा मतदान गर्नुपर्ने मतदाताको संख्या १ हजार ६ सय ६४ रहेकोमा १ हजार ६ सय ४९ मत मात्रै खसेको छ । मतदान सकिएपछि आजै राती ८ बजेदेखि मतगणना हुने कार्यक्रम छ ।