गणतन्त्रमा शासन बद्लियो अब अवस्था बदल्नुपर्छ : केन्द्रीय सदस्य ढुङ्गाना

इटहरी : नेपाली काङ्ग्रेसका केन्द्रीय सदस्य राजीव ढुङ्गानाले १२ कक्षा पढिसक्दा नसक्दै युवाहरू विदेश जाने अवस्था आउनु दुखद भएको बताएका छन् । गणतन्त्र दिवसको अवसरमा सुनसरीको इटहरीमा नेपाली काङ्ग्रेस सुनसरी क्षेत्र नम्बर २ क ले आयोजना गरेको राणा काल देखि गणतन्त्रसम्म नामक अन्तरक्रिया कार्यक्रममा बोल्दै ढुङ्गानाले यस्तो बताएका हुन् । उनले पटक पटक शासन बदलिए पनि अवस्था बदलिन नसकेको भन्दै चिन्ता समेत प्रकट गरेका छन् । कार्यक्रममा बोल्दै उनले पछिल्लो समय १२ कक्षा पढिसक्दा नसक्दै युवाहरू विदेश जाने अवस्था आउनु भन्ने कुराले नै देशको अवस्था छर्लङ्ग हुने बताए । केन्द्रीय सदस्य समेत रहेका ढुङ्गानाले देशमा आर्थिक क्रान्ति आवश्यक भएको र त्यसको नेतृत्व अब काङ्ग्रेसले गर्ने समेत बताएका छन् । उनले नेपाली काङ्ग्रेस सधैँ लोकतान्त्रिक मूल्य र मान्यताका पक्षमा रहेका कारण मात्र देशमा गणतन्त्र आएको दाबी गरे । ढुङ्गानाले देशलाई अप्ठ्यारो परेको बेला अमेरिका कुद्ने र कानुनको धज्जी उडाउने रवि लामिछानेलाई सरकारमा बस्ने कुनै अधिकार नभएको समेत जिकिर गरेका छन् । रवि लामिछानेले काङ्ग्रेसको विरोध गरेर दमन गर्न खोजे काङ्ग्रेस एक्लैले उनको दुस्साहसलाई परास्त गरिदिने समेत दाबी गरेका छन् । केन्द्रीय सदस्य ढुङ्गानाले काङ्ग्रेसलाई कमजोर आकलन गरिने रवि आफै सकिने दाबी समेत गरेका छन् । कार्यक्रममा नेपाली काङ्ग्रेस केन्द्रीय सदस्य राजीव कोइराला,सुनसरी जिल्ला सभापति केदार भण्डारी,कोशी प्रदेश सदस्य केशव भट्टराई,महाधिवेशन प्रतिनिधि विकास केसी,पूर्व भौतिक राज्य मन्त्री सिताराम मेहता,महासमिति सदस्य गीता श्रेष्ठ, सुनसरी क्षेत्र नम्बर २ क का सभापति सुभेछुक देवान लगायतले मन्तव्य राखेका थिए । काङ्ग्रेस एकजुट भएर हिँड्न सके कसैले परास्त गर्न नसक्ने वक्ताहरूको जोड थियो ।