सेछ एडभेञ्चर पार्कको स्थापना दिवसमा यस्ता छन् छुट प्याकेजहरू

धरान : धरान २० चिण्डे डाँडामा रहेको सेछ एडभेञ्चर पार्कले आफ्नो स्थापनाको चौथो वर्षमा प्रवेश गरेको अवसरमा विभिन्न प्याकेज सार्वजनिक गरेको छ । पार्कमा उपलब्ध एडभेञ्चर खेलहरू, खानपिन र वनभोज खानेहरूका लागि छुट प्याकेजहरूको घोषणा गरेको निर्देशक बासुदेव बरालले जानकारी दिए । उनकाअनुसार पार्कमा स्काई साइकल, जीपलाईन, हेङ्गिङ ब्रीज, ३६० डिग्री साइकल, रसियन सर्कल लगायतका साहसिक खेलहरू सञ्चालनमा छन् । एडभेञ्चर पार्कले पिकनिक प्याकेज, एक सय प्रतिशत क्यास ब्याक’ प्याकेज र विद्यार्थीहरूका लागि ‘डेकेशन’ प्याकेज विज्ञप्तिमार्फत सार्वजनिक गरेको हो । डेकेशन प्याकेजमा विद्यार्थीहरूलाई छोटो हाइकिङका साथै स्काई साइकल र जिप लाइन एक्टिभिटी, ब्रेकफास्ट, लञ्च र नाचगान सहितको कार्यक्रममा प्रति विद्यार्थी एक हजार दुई सय रुपैयाँमा उपलब्ध गराउने भएको छ । पिकनिकको प्याकेजमा जिप लाइन, स्काई साइकल, ब्रेकफास्ट, र लञ्च उपलब्ध गराइने छ । पिकनिकको अन्य आवश्यक सुविधाहरू पार्कमै उपलब्ध हुनेछन् । हाईकिङ गर्न नचाहनेहरूका लागि गाडीको पनि व्यवस्था हुनेछ । उक्त सुविधाहरू प्रतिव्यक्ति शुल्क एक हजार पाँच रुपैयाँमा उपलब्ध हुनेछन् । सेछले एक सय प्रतिशत शुल्क फिर्ता पाइने ‘क्यास ब्याक’ प्याकेजसमेत सार्वजनिक गरेको निर्देशक बरालले बताए । उक्त प्याकेजबाट शुल्क फिर्ता पाउन आगन्तुकले पार्कमा खेलहरू खेलेर अन्य ३ जनालाई पार्कमा पठाएमा तिरेको शुल्क शतप्रतिशत फिर्ता पाइने छ । स्थापना दिवसको अवसरमा कात्तिक २४ गते शनिबार सबैका लागि जीपलाईन कार्यक्रमको आयोजना गरेको छ । उक्त दिन पार्कमा आउने सबै आगन्तुकहरूहरुले जिप लाइन एक सय रुपैयाँमा खेल्न पाउने छन् । धरानलाई पूर्वको पर्यटनको हब बनाउन ‘सेछ’ले पर्यटकीय गतिविधिहरू गर्दै आएको छ ।