‘बसले ठक्कर दिएपछि मलाई नमार भन्दै थिइन्, ब्याक गरी किचेर मा¥यो,’

इटहरी : गत बिहीबार (कात्तिक २९ गते) देखि विद्यालयमा अध्यापन सुरू भयो । दसैँ, तिहारलगायतका चाडपर्वमा छुट्टी भएको विद्यालयमा अध्यापन सुरू भएपछि हौस्सिएर गइन्, इटहरी १० की सजना यादव । तर, विद्यालयमा अध्यापन भएको तीन दिनमै उनले दुर्घटनामा ज्यान गुमाउनुपर्यो । आइतबार (आज) विद्यालयबाट घर आउने क्रममा करिब ४ः३० बजेतिर बसको ठक्करबाट उनको घटनास्थलमै मृत्यु भएपछि अहिले परिवारजन विक्षिप्त बनेका छन् । दियारानी भनिने १३ वर्षीया सजनाको घटनास्थलमै मृत्यु भएपछि घटनास्थल तनावग्रस्त बनेको थियो । आक्रोशित स्थानीयबासीले ठक्कर दिने बस पूर्ण रूपमा जलाएका छन् । झापाको काकडभिट्टाबाट विराटनगरतर्फ आउँदै गरेको मे १ ख ४५७४ नम्बरको बसले साइकलमा सवार रहेकी सजनालाई ठक्कर दिएको थियो । ठक्करबाट घाइते भएकी उनलाई बसले ‘ब्याक’ गरी किचेर मारेको प्रत्यक्षदर्शी एक महिलाले बताइन् । ‘मलाई केही भएको छैन । नमार भन्दै थिइन्, बसले ब्याक गरी किचेर मा¥यो,’ प्रत्यक्षदर्शी ती महिलाले भनिन्, ‘त्यसपछि बस भाग्यो । भाग्दै जाँदा स्थानीयबासीले ढुंगामुढा गरेर आगजनी गरे ।’ उक्त बस खनार चोकमा रहेको नहर नजिकै स्थानीयबासीले जलाएका छन् । आक्रोशित भीडलाई नियन्त्रणमा लिन प्रहरीले हवाई फायरसमेत गरेको थियो । सुनसरीका प्रहरी प्रमुख (एसपी) सुमन कुमार तिम्सिना, इलाका प्रहरी कार्यालय इटहरीका डीएसपी लक्ष्मी भण्डारीसहित सशस्त्र प्रहरी बाक्लो मात्रामा खटिएका थिए । स्थिति नियन्त्रणबाहिर गएपछि प्रहरीले हवाई फायरसमेत गरेको थियो । इटहरी ९ मा रहेको जनता माध्यमिक विद्यालयमा कक्षा ९ मा अध्ययनरत रहेकी सजनाको मृत्युपछि उनकी आमा अनिताकुमारी यादव अहिले बेहोस भएकी छिन् । मृतकका दाजु रोशन यादवका अनुसार सजनाले डाक्टर बन्ने सपना राखेकी थिइन् । सोही विद्यालयमा कक्षा १० मा अध्ययनरत रोशनले भने, ‘बहिनी ट्यालेन्ट थिइन्, डाक्टर बन्ने सपना थियो ।’ भावविह्वल अवस्थामा रहेका रोशनले बहिनी सजनाले डाक्टर बन्ने सपना राखेपनि बसको गम्भीर लापरबाहीका कारण अकालमै ज्यान गुमाउनुपरेको बताए ।   मृतक बालिकाको शव पोस्टमार्टमका लागि विराटनगरस्थित कोसी अस्पतालमा लगिएको छ । उनका बुबा श्यामलाल यादव र आमा अनिताकुमारी ज्याला, मजदुरी गर्दै आएका छन् । यहाँको रिलायन्स फ्याक्ट्रीमा मजदुरी गर्दै आएका उनीहरूले बसको गम्भीर लापरबाहीका कारण छोरीको मृत्यु भएपछि चालकलाई कडा कारबाहीको माग राखेका छन् । दुर्घटनामा संलग्न बस र चालकलाई प्रहरीले नियन्त्रणमा लिएर अनुसन्धान सुरू गरेको छ । खासगरी पूर्वतिर कुद्ने रातो बस तीव्र गतिका सञ्चालन हुने भएकाले प्रहरीले चेकिङमा कडाई गर्नुपर्ने स्थानीयको माग छ । तीव्र गतिमा बस चलाउँदा दुर्घटना बढेको भन्दै यसतर्फ प्रहरीले विशेष निगरानी बढाउनुपर्ने स्थानीयले माग राख्दै आएका छन् । बस चालक विराटनगर महानगरपालिका वडा नं. १३ बस्ने २७ वर्षीय अमित श्रेष्ठलाई इलाका प्रहरी कार्यालय इटहरीले नियन्त्रणमा लिएको छ ।