लायन्स इन्टरनेसनल डिस्ट्रिक्ट सम्मेलन:सेकेन्ड भाइस गभर्नरमा रमेश खत्रीको सशक्त दाबी

इटहरी : कोशी प्रदेशको राजधानी विराटनगरमा आयोजना हुने ‘लायन्स इन्टरनेसनल डिस्ट्रिक्ट ३२५ सी’ सम्मेलनका लागि धमाधम उम्मेदवारी घोषणा भइरहेको छ । सम्मेलन यही चैत २३ गते विराटनगरमा हुने छ । सामाजिक कार्यमा सक्रिय संस्थाका विभिन्न पदका लागि उम्मेदवारी घोषणासँगै प्रचारलाई पनि तीव्र पारिएको छ । उम्मेदवारी घोषणा गरेकाहरूले समूहगत रूपमा सक्रियता बढाएका छन् । उम्मेदवारीपछि नतिजा आफ्नो पक्षमा पार्नलाई विभिन्न रणनीति अपनाउने गरेको पाइन्छ । सेकेन्ड भाइस डिस्ट्रिक्ट गर्भनरका लागि उम्मेदवारी दिएका रमेशकुमार खत्रीको टिमले इटहरीस्थित दुर्गा पार्टी प्यालेसमा बिहीबार एक समारोहमार्फत आफ्नो चुनावी अभियान र प्रचार कार्यक्रमको आयोजना गरेको छ । कार्यक्रममा इटहरी क्षेत्रका लायन्स क्लबका प्रतिनिधिहरूको सहभागिता थियो । पूर्व गभर्नर राजन खत्री,  डिस्ट्रिक्ट क्याबिनेट सेक्रेटरी उदयनारायण बराल, लियोका डिस्ट्रिक्ट भाइस प्रेसिडेन्ट शिवशङ्कर मण्डल, लायन्स क्लब अफ सुनसरीका अध्यक्ष तेजबहादुर पुरीलगायतले कार्यक्रमलाई सम्बोधन गरे । वक्ताहरूले लायन्स क्लबलाई राजनीति गर्ने थलो नबनाईकन सामाजिक क्षेत्रमा अघि बढ्ने क्लबका रूपमा लिनुपर्ने बताए । पूर्व डिस्ट्रिक्ट गभर्नर राजन खत्रीले लायन्स सेवा गर्ने थलो भएको बताउँदै सबै सेवा भावले आउनुपर्ने कुरामा जोड दिएका छन् । लायन्समा कसैले राजनीति छिराउन खोजिए प्रतिवाद गर्ने उनिहरुको भनाइ छ । रमेशकुमार खत्रीको समूहलाई जिताउँदा सम्पूर्ण लायन्सको जित हुने उनिहरुको दाबी छ । यस्तै डिस्ट्रिक्ट गभर्नर अधिकारीले लायन्समा अत्यन्तै सौहार्द वातावरण रहेको बताए । सबै कुरा सिकेका व्यक्ति नै लायन्सको नेतृत्वमा आउनुपर्नेमा उनको जोड छ । अधिकारीले राजनीतिलाई पर राखेर लायन्समा आबद्ध हुनुपर्ने बताए । निर्वाचन नजिकिएसँगै मतदातामाझ चिनिन र उनीहरूलाई रिझाउन उम्मेदवारले यस्ता कार्यक्रमको आयोजना गर्ने गरेका छन् । कार्यक्रम आयोजनाको मुख्य उद्देश्य आफ्नो उम्मेदवारीका बारेमा जानकारी दिनु र एजेन्डाहरू सार्वजनिक गर्नु हो । उम्मेदवारले मतदाताको प्रोत्साहनका एजेन्डा प्रस्तुत गर्ने गरेका छन् । यस डिस्ट्रिक्टका लागि गभर्नरमा बबरजंग् थापा र प्रथम भाइस डिस्ट्रिक्ट गभर्नरका लीला चिमोरियाको एकल दाबी छ । सेकेन्ड भाइस डिस्ट्रिक्ट गर्भनरका लागि रमेश खत्रीसहित अजिताकुमारी बराल मैदानमा छन् । सेकेन्ड भाइस गर्भनरका उम्मेदवार खत्रीले आफ्नो उम्मेदवारीले लायन्सलाई अझ मजबुत र एक ढिक्का बनाउन सहज हुने बताए ।

उनले गभर्नरसँगको सहकार्यमा अन्तर्राष्ट्रियकरण कार्यक्रमका प्रोजेक्टहरूमा काम गर्ने, क्लबलाई सशक्तीकरणको दिशातर्फ लैजाने, लायन्सको युथ इमपावरमेन्ट बढाउनका लागि काम गर्ने, डिस्ट्रिक्ट क्लबहरूलाई अझ सशक्त ढङ्गले र सक्रियतापूर्वक सामाजिक कामहरूमा लगाएर अन्तर्राष्ट्रिय स्तरको ब्राण्डिङ गर्ने उद्देश्य रहेको उनको भनाइ छ ।

खत्रीले प्रदेश खबरसँग भने, ‘लायन्सलाई एक ढिक्का पारेर लैजानका लागि हाम्रो समूह तयार छ ।’ ३२५ सी अन्तर्गत १ सय ५४ क्लबका ३ हजार बढि सदस्य रहेका छन् । लायन्सको इन्टरनेसनल डाइरेक्टरमा उम्मेदवारी दिएर लीला ढुङ्गेल र रेवतबहादुर कार्की मैदानमा उत्रिएका छन् ।