बिपी प्रतिष्ठानमा सकारात्मक परिवर्तन : हरियाली, रक्तदान र सरसफाइले फैलाउँदै सन्देश

धरान : धरानस्थित बिपी कोइराला स्वास्थ्य विज्ञान प्रतिष्ठानले सेवा, संवेदना र सत्कार्यको उत्कृष्ट मिसाल प्रस्तुत गर्दै समाजलाई परिवर्तनतर्फ उन्मुख गरिरहेको छ। माघ १७ गतेदेखि निरन्तर रूपमा सञ्चालनमा रहेको वातावरणीय सरसफाइ, वृक्षरोपण र रक्तदान अभियानले यो प्रतिष्ठानलाई केवल उपचारको केन्द्र मात्र होइन, समाज–सेवाको प्रेरणास्त्रोत पनि बनाएको छ।

“एक व्यक्ति, एक बिरुवा” — हरियाली अभियानमा सहभागीहरू
स्वास्थ्य सेवा दिने हातहरू अब हरियाली रोप्दै समाजलाई सुन्दर बनाउने अभियानमा छन्। ‘एक व्यक्ति, एक बिरुवा’ नारासहित सुरु गरिएको वृक्षरोपण अभियानमा डाक्टर, कर्मचारी, विद्यार्थी र बिरामीहरू समेत उत्साहपूर्वक जुटेका छन्। सयपत्री, धुपी, स्वामी, अमला, केरा, अम्बकजस्ता १५० भन्दा बढी फूल र फलफूलका बिरुवाहरू उनीहरूले आफ्नै खर्चमा रोपेका छन्। यो सानो प्रयासले ठूलो सन्देश दिएको छ—प्रकृतिप्रति हाम्रो उत्तरदायित्व अब शब्दमा होइन, कर्ममा देखिनुपर्छ।

‘रक्तदान, जीवनदान’ — जीवन बाँड्ने अभियान
साथै, रक्तदान अभियान पनि उत्तिकै प्रभावकारी बनेको छ। १०० भन्दा बढी व्यक्तिहरूले रक्तदान गरेका छन्। रक्तदानअघि अनिवार्य रूपमा वेट, ब्लड प्रेसर र हेमोग्लोबिन परीक्षण गरिएको छ, जसले कार्यक्रमलाई व्यवस्थित र सुरक्षित बनाएको छ। यो अभियानले ‘जीवन बचाउने’ सन्देशलाई मूर्त रूप दिएको छ।

स्वच्छ धरान, स्वस्थ समाज — सिर्जनात्मक सफाइ पहलहरू
धरान ५, देउराली क्षेत्रलाई सफा राख्ने उद्देश्यले सरसफाइ अभियान सञ्चालन गरिएको छ। डोको र बोरा प्रयोग गरी स्थानीय स्तरमै डस्बिन निर्माण गरिएको छ। प्रयोग भएका प्लास्टिक बोतलहरूलाई रि-युज गर्दै त्यसमा फूल रोपिएको छ र वातावरणीय सन्देशहरू लेखिएको छ—जसले सौन्दर्यसँगै चेतना पनि थपेको छ।

नयाँ सोच, नयाँ शैली — ‘हाइकिङ विथ क्लिनिङ’ देखि ‘जिम विथ क्लिनिङ’सम्म
युवाहरूलाई सामाजिक जिम्मेवारीप्रति आकर्षित गर्न ‘हाइकिङ विथ क्लिनिङ’, ‘सप्ताहव्यापी क्लिनिङ’ र ‘जिम विथ क्लिनिङ’ कार्यक्रमहरू सञ्चालनमा छन्। जन्मदिन मनाउने परम्परामा पनि रचनात्मक मोड आएको छ—अब ब्लड बैंकमा गमला वा डोको उपहार दिने चलन सुरु भएको छ, जुन साँच्चिकै अर्थपूर्ण उपहार बन्न पुगेको छ।

सपना बोकेका अभियन्ता, सन्देश फैलाउने अभियान
यो अभियान पछाडि उभिएका मनहरू हुन्—धिरेन्द्र कुमार साह (सिरहा), समिक्षा थापा (भोजपुर), लक्ष्मी प्रधान, उमेश कर्ण, मन्दिरा लिम्बू, मोनालिसा श्रेष्ठ र प्रेम बिस्वकर्मा। उनीहरूको शब्दमा, “रक्तदान मानिसले गर्न सक्ने सबैभन्दा ठूलो दान हो । सकारात्मक सोच र सानो सहयोगले पनि ठूलो परिवर्तन सम्भव छ।”

अन्तिम सन्देश — साना काम, ठूलो असर
धरानमा दर्जनौं संघसंस्था सक्रिय रहे पनि प्रभावकारी योगदान दिनेलाई औंलामा गन्न सकिने अवस्था रहेको भन्दै ब्यक्तिगत रुपमै खटिरहेका अभियानकर्ताहरूले सबैको सहकार्यको आह्वान गरेका छन्। उनीहरूको दृढ विश्वास छ—“साना तर स्थायी कामहरूबाट बिपी प्रतिष्ठानलाई देशकै नमुना संस्थाका रूपमा स्थापित गर्न सकिन्छ।”