खोटाङ : अख्तियार दुरुपयोग अनुसन्धान आयोगले नेकपा एमाले खोटाङका तीन जना नेताविरुद्ध भ्रष्टाचारको आरोपमा विशेष अदालतमा मुद्दा दायर गरेको छ। आयोगले बिहीबार भ्रष्टाचार गरी गैरकानूनी लाभ लिएको तथा राज्यलाई हानि पुर्याएको ठहर गर्दै मुद्दा दायर गरेको हो।
मुद्दा पर्नेमा एमाले कोशी प्रदेश कमिटी सदस्य तथा पूर्व जिल्ला समन्वय समिति सदस्य चर्चबहादुर विश्वकर्मा, एमाले कोशी प्रदेश कमिटी सल्लाहकार सदस्य एवम् पूर्व ईलाका सदस्य दिलीप कुमार राई, र २०७९ सालको स्थानीय तह निर्वाचनमा एमालेबाट निर्वाचित दिप्रुङ चुइचुम्मा गाउँपालिका–४ बतासेका वडाध्यक्ष बवेन्द्र राई रहेका छन्।
तीनै जना नेताले दिप्रुङ चुइचुम्मा गाउँपालिका–४ मा अवस्थित जनता उच्च माध्यमिक विद्यालयलाई जिल्ला शिक्षा कार्यालय खोटाङबाट प्राप्त विभिन्न विषयका अनुदान रकम हिनामिना गरेको आरोप छ। आयोगका अनुसार चर्चबहादुर विश्वकर्माले २४ लाख, दिलीप कुमार राईले ३० लाख ५० हजार र बवेन्द्र राईले ७ लाख रुपैयाँको भ्रष्टाचार गरेको देखिएको छ।
अख्तियारले उनीहरूमाथि बिगो रकमसहित विशेष अदालतमा भ्रष्टाचार मुद्दा दायर गरेको जनाएको छ। वडाध्यक्ष बवेन्द्र राई मुद्दा दर्ता भएसँगै निलम्बनमा परेको जानकारी प्राप्त भएको छ।
यस घटनाले एमालेभित्रको आन्तरिक अनुशासन र पारदर्शितामाथि पनि प्रश्न उठाइरहेको छ। अब अदालतको फैसला पश्चात् मात्र उनीहरूको दोष वा निर्दोष प्रमाणित हुनेछ।
युनिकोड
मिति रूपान्तरण
_lvFlpr7y3Z.png)
प्रदेश खबर
प्रतिक्रिया