३१ दिन पैदल यात्रा गरेर काठमाडौँ आएका बोहोराले प्रधानमन्त्री भेट्न पाएनन्

काठमाडौँ । ३१ दिन यात्रा तय गरेर प्रधानमन्त्री केपी शर्मा ओलीलाई भेट्न सङ्घीय राजधानी काठमाडौँ आएका सुर्खेतका नवराज बोहोरा प्रधानमन्त्रीसँग भेट गर्न दिइएन ।

मङ्गलवार सुर्खेतबाट खाली खुट्टा पैदल यात्रा गरी काठमाडौँ आएका बोहरा प्रधानमन्त्री ओलीको सरकारी निवास बालुवाटार पुग्दा उनलाई प्रहरीले अवरोध गरेको थियो । प्रहरीको निगरानीमा रहेका उनलाई प्रधानमन्त्रीलाई भेट्नै नदिई फर्काइएको थियो ।

त्यसपछि उनी सिंहदरबारस्थित प्रधानमन्त्री एवम् मन्त्रिपरिषद्को कार्यालय पुगेका थिए । त्यहाँ पनि उनले प्रधानमन्त्री ओलीलाई भेट्न पाएनन् । उनले मुख्यसचिव एकनारायण अर्याललाई भेटेर आफ्ना मुद्दाबारे जानकारी गराएको प्रहरीले जनाएको छ । सिंहदरबारमा सञ्चारकर्मीसँग बोल्न खोजेका बोहोरालाई प्रहरीले अवरोध गरेको थियो ।

अनियमितता र भ्रष्ट्राचार विरुद्ध खाली खुट्टा पैदल अभियान र कर्णालीको मुद्दा लिएर उनी जेठ ४ गते सुर्खेतबाट हिँडेका थिए ।

उनी कर्णालीका मुद्दाहरू एवम् अनियमितता र भ्रष्ट्राचारका विषयहरू लिएर काठमाडौँ आएका हुन् ।