धरानकी १९ बर्षीया अनिताको शव सप्तकोशी किनारमा फेला

इटहरी । सुनसरीको बराहक्षेत्र नगरपालिका–९ राजाबासस्थित सप्तकोशी नदी किनारमा धरान–१६ की १९ वर्षीया अनिता राईको शव फेला परेको छ ।

इलाका प्रहरी कार्यालय महेन्द्रनगरका प्रहरी निरीक्षक दिवस कुँवरका अनुसार आइतबार बिहान करिब ८ बजे स्थानीयवासी दाउरा खोज्ने क्रममा शव देखेपछि प्रहरीलाई खबर गरेका थिए । त्यसपछि घटनास्थलमा पुगेको प्रहरी टोलीले शवलाई नियन्त्रणमा लिएर आवश्यक कानुनी प्रक्रिया पूरा गरी धरान पठाउने तयारी गरेको छ ।

गत शुक्रबार बराहक्षेत्र–१ मा पर्ने मदन भण्डारी राजमार्गको दुध खोलामा मोटरसाइकलसहित बुबा–छोरी बगेका थिए । सो क्रममा बुबा जीवन राईलाई स्थानीयवासी र प्रहरीले तत्कालै उद्दार गर्न सफल भए पनि छोरी अनिता भने खोलासँगै कोशीमा मिसिएर बेपत्ता भएकी थिइन् ।

शनिबार दिनभर कायकको सहयोगमा घटनास्थलदेखि राजाबाससम्म खोजी अभियान चलाइएको थियो । आइतबार बिहान पुनः राजाबासदेखि कोशी ब्यारेजसम्म प्रहरी टोली परिचालन गरिएको अवस्थामा राजाबासमै शव फेला परेको प्रहरीले जनाएको छ ।