अरुण नदीमा बेपत्ता दुई बालिका अझै फेला परेनन्,खोजी कार्य जारी

भोजपुर : अरुण नदीमा नुहाउन गएका दुई बालिका अझै बेपत्ता छन् । हतुवागढी गाउँपालिका–९, मचुवाटारकी १३ वर्षीया खुसी राई र १२ वर्षीया कृषिका राई बुधबार दिउँसोदेखि हराइरहेका हुन् ।

उनीहरू दुवै जना कक्षा ८ मा अध्ययनरत विद्यार्थी हुन् ।

बुधबार दिउँसो नुहाउन गएका उनीहरू साँझसम्म पनि घर नफर्किएपछि परिवारले प्रहरीलाई जानकारी गराएका थिए ।

जानकारी पाउनासाथ प्रहरीले खोजी कार्य सुरु गरेको जिल्ला प्रहरी कार्यालय भोजपुरका प्रमुख डीएसपी युवराज तिमिल्सिनाले जनाएका छन् ।

नदीमा पानीको सतह बढिरहेको भए पनि खोजी कार्य तीव्र पारिएको प्रहरीले जनाएको छ ।

खोजीमा स्थानीयबासीसँगै भोजपुर, धनकुटा, सुनसरी र सप्तरीका प्रहरीबीच समन्वय गरिएको छ । अहिलेसम्म दुवै बालिका फेला नपरेको प्रहरीले जनाएको छ ।