धनुषामा रात्री बसले अटोलाई ठक्कर दिँदा एकै परिवारका दुईसहित चार जनाको मृत्यु

धनुषा : धनुषाको गणेशमान चारनाथ नगरपालिकामा बस र अटो ठोक्किँदा एकै परिवारका दुईसहित चार जनाको मृत्यु भएको छ।

दम्पतीका दुईजना बालबालिका गम्भीर घाइते भएका छन्। दुर्घटनापछि आक्रोशित स्थानीयले पूर्व–पश्चिम राजमार्ग ठप्प पारेका छन्।

शनिवार साँझ करिब ६:५० बजे वीरेन्द्रबजार नजिकै विराटनगरबाट धनगढीतर्फ जाँदै गरेको सु.प्र.०१-००१ ख ३२८८ नम्बरको बसले प्र.२-०१-००१ ह १२३० नम्बरको अटोमा ठक्कर दिएको धनुषा प्रहरीका अनुसार जानकारी गराइएको छ।

दुर्घटनामा गणेशमान चारनाथ नगरपालिका–४ का ४० वर्षीय रमेश मगर र उनकी ३५ वर्षीया श्रीमती निशा मगरको घटनास्थलमै निधन भएको हो।

उनीहरूका १४ वर्षीया छोरी शीतल र ८ वर्षीय छोरा रोशन गम्भीर घाइते भई जनकपुरस्थित अस्पतालमा उपचाररत छन्। दुवैको अवस्था अत्यन्तै गम्भीर रहेको प्रहरीले जनाएको छ।

त्यसैगरी सोही नगरका ३५ वर्षीय शम्भु मगर र ४० वर्षीय डमर राईको पनि उपचारका क्रममा मृत्यु भएको छ। मृतकको शव प्रादेशिक अस्पताल र न्युरो अस्पताल जनकपुरमा राखिएको छ।

दुर्घटनापछि करिब चार सयभन्दा बढी स्थानीयले टायर बालेर राजमार्ग अवरुद्ध गर्दै प्रदर्शन गरेका छन्। तीव्र आक्रोशका बिच दुवैतर्फको यातायात अवरुद्ध हुँदा यात्रुहरू अलपत्र परेका छन्। स्थिति नियन्त्रणमा लिन ठूलो सङ्ख्यामा प्रहरी परिचालन गरिएको छ।

ठक्कर दिने बसका चालक कैलालीका ३६ वर्षीय अनिल डगौरा थारु प्रहरीले नियन्त्रणमा परेका छन्। स्थानीयलाई सम्झाउँदै राजमार्ग खुलाउने प्रयास भइरहेको भए पनि त्यस क्षेत्रमा अवस्था तनावपूर्ण नै रहेको सुरक्षा निकायले जनाएको छ।