मोरङ कारागारमा वैशाखयता १४ ले गुमाए ज्यान

विराटनगर : विराटनगरस्थित जिल्ला कारागार मोरङका अर्का थुनुवाको पनि शनिबार दिउँसो मृत्यु भएको छ । वैशाखयता कारागारमा रहेका १४ जना कैदीबन्दी तथा थुनुवाको मृत्यु भइसकेको छ ।

कारागार प्रशासक गौरव ढुंगेलका अनुसार लागुऔषध मुद्दाका थुनुवा मोरङको उर्लाबारी नगरपालिका–१ का ३७ वर्षीय टंकबहादुर दर्जीको शनिबार मृत्यु भएको हो । शरीर सुन्निने र सास फेर्न गाह्रो हुने समस्या देखिएपछि दर्जीलाई मंसिर ७ गते उपचारका लागि कोशी अस्पतालमा भर्ना गरिएको थियो । 

चिन्ताजनक अवस्थामा अस्पताल भर्ना गरिएका उनलाई सुरुदेखि नै आईसीयूमा राखेर उपचार सुरु गरिएको थियो । उपचारकै क्रममा शनिबार दिउँसो मृत्यु भएको ढुंगेलले बताए । 

लागुऔषध मुद्दाका थुनुवा रहेका दर्जीलाई अदालतले गत साउन ३० गते थुनामा राखेर मुद्दाको पुर्पक्ष गर्न आदेश दिएको थियो । आदेशपछि कारागार चलान गरिएका उनीविरुद्धको मुद्दा हाल अदालतमा विचाराधीन छ । मुद्दाको किनारा नलाग्दै दर्जीको मृत्यु भएको हो । शव आफन्तले जिम्मा लिएर लगिसकेको कारागार प्रशासनले जनाएको छ । 

मोरङ कारागार प्रशासनका अनुसार दर्जीसँगै वैशाखयता कैदीबन्दी र थुनुवा गरेर मृत्यु हुनेको संख्या १४ पुगेको छ । पछिल्लो समय कारागारमा राखिएका कैदीबन्दी एवं थुनुवाको मृत्यु हुने क्रम बढेको छ । 

मोरङ कारागारका २ जना कैदीको बिहीबार मात्रै मृत्यु भएको थियो । जंगली हात्ती मारेको आरोपमा ५ वर्ष कैद सजाय सुनाइएका मोरङको बेलबारी नगरपालिका–३ घर भएका ४७ वर्षीय तेजबहादुर राई र कर्तव्य ज्यान मुद्दामा १० वर्ष कैद तोकिएका मोरङको पथरीशनिश्चरे नगरपालिका–५ का ६६ वर्षीय हर्कजंग लिम्बूको बिहीबार मृत्यु भएको हो । 

पछिल्लो समय कारागारका कैदीबन्दी तथा थुनुवामा शरीर सुन्निने, सास फेर्न गाह्रो हुुने र छाती दुख्ने समस्या बढ्दै गएको छ । स्वास्थ्यमा समस्या देखिनसाथ उनीहरुलाई अस्पताल लैजाने गरिएको ढुंगेलले बताए । तर, उपचारकै क्रममा कैदीबन्दी तथा थुनुवाको मृत्यु हुने गरेको उनको भनाइ छ ।