जेन्जी आन्दोलनमा केन्द्रीय कारागार काठमाण्डौंबाट फरार कैदी झापाबाट पक्राउ

इटहरी । जेन्जी आन्दोलनको दौरान २०८२ भदौ २४ गते केन्द्रीय कारागार काठमाण्डौंबाट फरार भएका कैदी ऐराजुल हकलाई प्रहरीले झापाबाट पक्राउ गरेको छ। लागुऔषध कारोबार र जाली नोट सम्बन्धी मुद्दामा सजाय काट्दै आएका पन्थपडा बस्ने ३० वर्षीय हक तीन महिनादेखि फरार थिए।

आज (आईतबार)  बिहान करिब ९:४५ बजे झापा गाउँपालिका–४ भामटोलीस्थित आफन्तको घरमा लुकिछिपी बसेको अवस्थामा इलाका प्रहरी कार्यालय कुमरखोदबाट खटिएको प्रहरी टोलीले उनलाई नियन्त्रणमा लिएको हो।

प्रहरी नायब निरीक्षक किरण मोक्तानको कमाण्डमा गएको टोलीले विशेष सूचनाका आधारमा हकलाई फेला पारी पक्राउ गरी झापा जिल्ला प्रहरी कार्यालयमा ल्याएको प्रहरी स्रोतले जनाएको छ।

पक्राउ परेका हकलाई आवश्यक कानुनी प्रक्रिया पूरा गरी सम्बन्धित कारागारमा पठाउने तयारी भइरहेको प्रहरीले जनाएको छ।