विराटनगरमा मोटरसाइकल दुर्घटना हुँदा प्रहरी जवान खड्काको मृत्यु

विराटनगर। विराटनगरमा मोटरसाइकल दुर्घटना हुँदा ३० वर्षीय प्रहरी जवान भीम खड्काको मृत्यु भएको छ।

आज (बिहीबार) राति करिब १२:२५ बजे विराटनगर महानगरपालिका–३ बरगाछी चोक नजिक कोशी राजमार्गमा दुर्घटना भएको प्रहरीको प्रारम्भिक जानकारीमा उल्लेख छ।

विराटनगरबाट कञ्चनवारीतर्फ जाँदै गरेको बा.प्र.०२–०४३ प ७७१६ नम्बरको मोटरसाइकल अनियन्त्रित भई सडकमा पल्टिँदा मोरङको बेलबारी नगरपालिका–८ घर भएका खड्का गम्भीर घाइते भएका थिए। उनी कोशी प्रदेश प्रहरी कार्यालय, रानी विराटनगरमा कार्यरत प्रहरी जवानसमेत हुन् ।

दुर्घटनाको खबर पाएलगत्तै CRV बरगाछिबाट प्रहरी निरीक्षक पाल्टेन दोर्जे लामाको टोली घटनास्थलमा पुगेको थियो। घाइते खड्कालाई तत्कालै बिराट नर्सिङ होम, विराटनगरमा लगेपनि बिहान ४:०० बजे उपचारका क्रममा खड्काको मृत्यु भएको अस्पतालले जनाएको छ। दुर्घटनाग्रस्त मोटरसाइकल प्रहरीको नियन्त्रणमा राखिएको छ। दुर्घटनाबारे थप छानबिन जारी रहेको प्रहरीले जानकारी दिएको छ।