प्रदर्शनको पर्खाइमा ‘वानर सेना’

झापा । अर्पण गिरीले निर्देशन गरेको चलचित्र ‘वानर सेना’ प्रदर्शनको पर्खाइमा छ । रामायणसँग सम्बन्धित कथामा आधारित यो चलचित्र गिरी ग्रेण्ड फिल्म प्रालिको ब्यानरमा तयार गरिएको हो । रामायणमा हालसम्म नखुलाइएका विषयलाई कथाबस्तु बनाएर चलचित्र तयार पारिएको दाबी गरिएको छ । क्यानाडाको विनिपेगमा बसेर चलचित्रसम्वन्धी अध्ययन गर्दै चलचित्र निर्माणका लागि तीन वर्ष अनुसन्धान गरेका अर्पणले चलचित्र तयार पारेका हुन् । यो चलचित्र युवराज गिरीले निर्माण गरेका हुन् । चलचित्रमा नायकको भूमिकामा आफैं देखा पर्ने अर्पणले नायिकाका रुपमा आर्जु प्रसाईलाई समेत डेब्यू गराउन लागेका छन् । यो चलचित्र निर्माण र निर्देशन झापालीले गर्न लागेका हुन् । चलचित्र निर्माणकर्ता युवराज निर्देशक अर्पणका बुवा हुन् । प्रोडक्सन म्यानेजरका रुपमा युवराजकी छोरी अंशिका गिरी छिन् । भारतका रामानन्द सागरले लेखेको रामायणमा देखाइएको जस्तो कथावस्तु यो चलचित्रमा नरहने र रामायणमा लुकेका पक्षलाई समेटेर चलचित्र तयार गरिएको निर्माता युवराजको दावी छ । यो चलचित्रमा रामायणमा जस्तो राम, लक्ष्मण, सीता, हनुमानको चरित्र नहुने र आधुनिक समयलाई प्रतिनिधित्व गर्दै चलचित्र तयार गरिएको निर्माण पक्षको भनाइ छ । रामायणमा राम्रो कर्म गर्नेलाई मर्यादा पुरुषोत्तमका रुपमा रामलाई हेरिने गरिएको र खराब प्रवृत्ति भएकालाई रावणको भूमिकामा हेरिएजस्तै यो चलचित्रमा पनि राम र रावणको भूमिकालाई प्रतिनिधित्व गर्ने गरी पात्र चयन गरिएको र उनीहरुलाई सोही अनुसारको भूमिका प्रदान गरिएको निर्माता गिरीले बताए । उनले भने ‘रामायणकालीन समयको जस्तो यो चलचित्र छैन तर, राम र रावणको चरित्रलाई जनाउन खोजिएको छ ।’ चलचित्र छायाङ्कनका लागि लंकाको जस्तै परिवेश देखिने स्थानलाई चयन गरिएको र नेपालको श्रीलङ्काका नामले परिचित केसीको टापुमा चलचित्र छायांकन गरिएको छ । चलचित्र चक्रघट्टी, रामधुनी, राजावास, जनकपुर, उदयपुर, कोसी लगायतका क्षेत्रमा छायङ्कन गरिएको छ । चलचित्रमा चारवटा गीतलाई समावेश गरिएको र गीतमा समेत हरेक पक्षलाई समेटिएको निर्देशक गिरीको दावी छ । झट्ट सुन्दा यो चलचित्र ऐतिहासिक, धार्मिक तथा पौराणिक जस्तो सुनिएपनि यो चलचित्र विशुद्ध सन्देशमूलक र पारिवारिक रहेको बताइएको छ । चलचित्रमा सुरवीर पण्डित, किशोर खतिवडा, अर्जुन गुरुङ, कामेश्वर चौरसिया, किशनबाबु बस्नेत, रमेश सोडारी, युवराज गिरी लगायतका कलाकारको अभिनय छ । चलचित्र आगामी असोजसम्ममा प्रदर्शनमा ल्याउने तयारी गरिएको छ ।