धरान बसपार्कको निर्माण कार्य ६० प्रतिशत सम्पन्न

धरानमा निर्माणाधिन स्मार्ट बसपार्कको निर्माण कार्य ६० प्रतिशत सम्पन्न भएको ठेकेदार कम्पनीले दाबी गरेको छ । निर्माण कम्पनी गीताञ्जली बी कोई जेभीका इन्जिनियर धर्मेन्द्र यादवले बसपार्कको भौतिक निर्माण कार्य ६० प्रतिशत सकिएको बताउनुभयो । उहाले भन्नुभयो –‘टर्मिनल भवनको मुख्य निर्माण कार्य सम्पन्न हुन लाग्यो र कम्पाउण्डको काम धमाधम भइरहेको छ ।’ उहाँले भन्नुभयो –‘बजेट अभाव नभएमा हामी निर्धारित समय भन्दा ६ महिना अगावै निर्माण कार्य सकेर प्रोजेक्ट हस्तान्तरण गछौं ।’ प्रदेश सांसदद्वय रमेशकुमार बस्नेत र विजयकुमार राईले निर्माणाधिन बसपार्कको निरिक्षण गर्नुभएको छ । आज विहानै बसपार्क पुग्नुभएका सांसदद्वयले बसपार्कको निर्माण कार्य प्रगति, निर्माणमा भइरहेका अफ्ट्यारो तथा निर्माण अवधीका बारेमा बुझ्नुभएको थियो । धरान गौरबको योजना भएपनि यसवर्ष धरान तथा प्रदेश सरकारले नै बजेट नछुट्याएपछि निर्माण कार्यमा बजेट अभाव हुने स्थिति रहेको निर्माण कम्पनीले बताएपछि सांसदले बजेटको व्यवस्थापनमा भूमिका खेल्ने बताउनुभएको थियो । धरानको तीनकुने सुन्दर बस्ती विकास आयोजनामा स्मार्ट बसपार्क बनिरहेको छ । २५ करोड रुपैयाँ लागतभित्र रहेर दुईतले टर्मिनल भवन र सडक–नाला बन्नेछ । दुई दशक अघि नै निर्माण गर्न योजना तयार भएता पनि जग्गाधनीसँग विवादका कारण आयोजना निर्माण कार्य अघि बढ्न सकेको थिएन । धरान उपमहानगरपालिकाकी तत्कालिन उपप्रमुख मन्जु भण्डारीले जग्गाधनीसँग पटकपटक वार्ता र छलफल गरेपछि विवाद समाधान भएसँगै स्मार्ट बसपार्क निर्माणले गति लिएको हो । आयोजनाभित्र बन्ने बसपार्कमा दुईतले टर्मिनल भवन, बेसमेन्टसहितको पार्किङ स्थल, सडक, प्रवेशद्वार बन्नेछ । उक्त भवनभित्र टिकट काउन्टर, यात्रु प्रतीक्षालय, शौचालय, एटीएम बुथ, सेक्युरिटी कक्षसहित होटल, लज रेस्टुरा पनि हुनेछन् ।’ आयोजनाभित्र बन्ने बसपार्कका लागि ३० कट्ठा जग्गा छुट्याइएको छ । त्यसबाहेक सेल्स प्लटमा थप ५ कट्ठा हाराहारी खाली जग्गा छुट्याइएको छ । बसपार्कबाट झापाको काँकडभिट्टा, ताप्लेजुङ, इलाम पाँचथर, धनकुटा, तेह्रथुम, भोजपुर, राजविराज, विराटनगरलगायत गन्तव्यमा यात्रु लिएर जान क्युमा रहने १९ वटा बस र अन्य १८ वटा बस गरी ३७ बस पार्किङ हुने गरी डिजाइन गरिएको छ । उनका अनुसार बसपार्कमा यात्रु लिएर आउने जाने २४ कार जिप, ७२ वटा दुईपाङ्ग्रे र ८२ वटा अटो पनि अटाउने क्षमताको पार्किङ स्थल निर्माण हुनेछन् । ‘निकट भविष्यमा इलेक्ट्रिक सवारीसाधन पनि आउन सक्ने भएकाले तिनिहरूका लागि चार्जिङ स्टेसन पनि तय गरिने बताइएको छ ।