शान्ति जनकल्याण सहकारीको निर्वाचन सकियो, मतगणना आजै

इटहरी २० तरहरामा रहेको शान्ति जनकल्याण बहुउद्येश्यीय सहकारी संस्था लिमिटेडको मतदान सम्पन्न भएको छ । सनिवार ( आज) भएको मतदानमा कूल १ हजार ५०९ मत खसेको  प्रमुख निर्वाचन अधिकृत द्रोर्ण न्यौपानेले जानकारी दिए । प्रमुख निर्वाचन अधिकृत न्यौपानेका अनुसार १ हजार ८४९ मतदातामध्ये १ हजार ५०९ मत खसेको हो । निर्वाचन सकिएसँगै मतगणना पनि आज गरिने न्यौपानेले बताए । आज राति ९ बजेबाट सहकारीको भवनमै मतगणना सुरु गरिने न्यौपानेको भनाइ छ । अध्यक्ष पदमा चन्द्रकुमार गिरी, बीरबहादुर लिम्बू, बसन्त श्रेष्ठ र मेघराज पराजुली प्रतिस्पर्धामा छन् भने  उपाध्यक्षका लागि कृष्णप्रसाद भट्टराई, चिन्तामणी सापकोटा र टंक पौडेल प्रतिस्पर्धामा छन्  । यता, लेखा समिति संयोजकमा कृष्णप्रसाद घिमिरे र लेखा समिति सदस्यमा सनत कोइराला निर्विरोध निर्वाचित भइसकेका छन् । लेखा समिति महिला सदस्यमा भने एकजनाका लागि तीनजनाको उम्मेदवारी परेको छ । यस्तै, खुल्ला सदस्य ६ पदका लागि २३ जनाले उम्मेदवारी दिएका थिए । सञ्चालक समितिमा तीनजना महिलाका लागि ६ जना प्रतिस्पर्धामा छन्  ।