विराटनगर आँखा अस्पतालले खोल्यो फिक्कलमा नयाँ आँखा अस्पताल

इलाम- विराटनगर आँखा अस्पतालले इलामस्थित सूर्योदय नगरपालिकाको फिक्कल बजारमा आफ्नो तेस्रो आँखा अस्पताल सञ्चालनमा ल्याएको छ । नेपाल नेत्र ज्योति संघले हालमा गरेको रैब (रेपिड एसेसमेन्ट अफ एभ्वाइडेबल ब्लाईन्डनेस) सर्भे अनुसार नेपालका ०.२ प्रतिशत जनसंख्यामा आँखाका समस्या देखाएका छन् । जसलाई न्यूनीकरण गर्दै आगामी दिनमा आँखाको समस्या ०.०१ सम्म पुर्‍याउने लक्ष्य हासिल गर्न कोसी प्रदेशका विभिन्न ठाउँहरूमा सर्जिकल सेन्टर तथा आँखा उपचार केन्द्रको स्थापना गर्ने योजना साथ अगाािड बढेको दाबी गरिएको छ । समाजमा दृष्टिविहिनताका प्रमुख कारणहरूमध्ये एक मोतियाबिन्दु हो । नेपालको सन्दर्भमा आधाभन्दा बढी बिरामीहरूलाई आफू मोतियाविन्दुको बिरामी हुँ भन्ने ज्ञान समेत छैन् ।

थाहा भएका बिरामीमा पनि उपचार गराउनु पर्छ भन्ने चेतना नहुँदा समस्या भइरहेको स्पतालका मेडिकल सुपेरिन्टेन्डेन्ट डा.रक्षा पन्तले बताइन् । उनकाअनुसार उपचारमा हेलचेक्रयाईँ गर्ने प्रवृत्ति मोतियाबिन्दु नियन्त्रणको मुख्य र जटिल चुनौती रहेको उनले बताइन् ।

समाज तथा आँखाका बिरामीहरूको आँखा स्वास्थ्य तथा आँखा दान सम्बन्धि जनचेतना फैलाउने उद्देश्यले विभिन्न खाले स्वास्थ्य शिक्षा कार्यक्रमहरू मार्फत समाजलाई सचेत गराइरहेको उनले बताइन् । अत्याधुनिक उपकरण तथा तथा अनुभवी चिकित्सकीय टोलीद्धारा गुणस्तरीय, सस्तो, सहज उपलब्ध हुने आँखा–कान सेवा र प्रभावकारी व्यवस्थापन मुख्य आकर्षण रहेको उनको भनाइ छ । इलामसँग जोडिएका जिल्लाहरूका बिरामीलाई मद्दत पुग्नुका साथै छिमेकी मुलुक भारतका बिरामीहरूसमेत लाभान्वित हुने बताउँछन्, कार्यक्रममा प्रमुख अतिथि सूर्योदय नगरपालिका मेयर रणबहादुर राई । यो क्षेत्रको पर्यटन प्रवद्र्धनमासमेत टेवा पुर्‍याउने विश्वास रहेको उनले बताइन् । कार्यक्रममा पद्मनारायण चौधरी, रविन्द्र लाल चौधरी, श्याम सुन्दर उदास, सुधीर ठाकुर, ईन्द्र फँयाल, राजन श्रेष्ठ तथा कुमार पृथुलगायतको उपस्थिति रहेको थियो ।