सीमावर्ती बजार
सस्तो मूल्यमा उपभोग्य वस्तु पाइने भएकाले हालको सन्दकपुर गाउँपालिका मात्र नभई, माइजोगमाई गाउँपालिकाका अधिकांश किसानको मुख्य बजार नै जौबारी रहेको थियो ।
इलाम नगरपालिकाको पनि पायक पर्ने स्थानका उपभोक्ता सोही बजारमाथि भर पर्ने गरेका थिए ।
जौबारी बजार जिल्लाकै फस्टाएको बजारका रूपमा परिचित थियो । भारतीय सीमासँग जोडिएका कारण किसानले सयौँ खालका सामान खरिद बिक्री गर्ने केन्द्रको रूपमा नै विकसित भएको थियो, जौबारी बजार ।
भारतीय व्यापारीको बाक्लो बसोबास भएकाले नेपाली गाउँघरमा उत्पादित कृषि बाली सजिलै भारतीय बजारसम्म जाने गर्दथ्र्यो ।
इलामको सन्दकपुर गाउँपालिकामा पर्ने जौबारी भारतीय सीमा जोडिएकोले विभिन्न प्राकृतिक सुन्दरतासँगै आफैँमा पनि पर्यटनको धेरै सम्भावना बोकेको ठाउँ हो ।
हिउँदमा प्रायः हिउँ परिरहने र चौँरी क्षेत्रसमेत भएको हुँदा भारतलगायत अन्य देशका विदेशी पर्यटक दार्जिलिङ हुँदै जौबारी नघुमी फर्कँदैन थिए ।
इलाम सदरमुकामको बिब्ल्याँटे बजार र माइजोगमाई गाउँपालिकाको नयाँ बजारमा भन्दा बढी चहलपहल र ठुलो बजारको रूपमा रहेको थियो, जौबारी ।
त्यसैले पनि सबै जौबारी जानुपर्ने बाध्यता जस्तै भएको सन्दकपुर गाउँपालिकाकै भोला खतिवडाको भनाइ छ ।
त्यसो त हिउँदको समयमा गाउँघरमा गाडी पुग्ने ठाउँसम्म आफैँ किसानले मागेको उपभोग्य सामान लिएर व्यापारी आउने र किसानले उत्पादन गरेको सरसामान लिएर जाने गर्ने गरेको नेपाल पत्रकार महासङ्घ इलामका अध्यक्ष विप्लव भट्टराईले बताए ।
हाल इलाम सदरमुकाममा बसेर पत्रकारिता गर्ने भट्टराई सोही क्षेत्रका स्थानीयवासी पनि हुन् । उनले जान्दा जौबारी बाहेक अन्य स्थानमा बजार भनेर जानु पर्दैनथ्यो ।
पछिल्लो समय सडकको सुगमतासँगै धेरै ठाउँमा बजार विस्तार हुन थालेपछि जौबारी बजार व्यापारका हिसाबमा इतिहासमा सीमित बन्ने पक्का जस्तै भएको छ ।
पछिल्लो समय निकै ठुलो कारोबार हुने बजार खुम्चिँदै गएको छ । जिल्लाको सन्दकपुर गाउँपालिका र माईजोगमाईको प्रमुख बजारका रूपमा परिचित जौबारी हाल सुनसान जस्तै बनेको छ ।
व्यापार फस्टाएकाले नेपालको छोटी भन्सार पनि त्यो समयमा राखिएको थियो ।
यसरी जौबारी व्यापारी केन्द्रको रूपमा राम्ररी फस्टाउँदै गएको समयमा नेपालको १० वर्षे सशस्त्र द्वन्द्वले जौबारीलाई पनि अछुतो राख्न सकेन ।
भएको प्रहरी चौकी पनि सुरक्षाको कारण देखाउँदै सदरमुकाम तानिएपछि भारतीय व्यापारीले दिन गन्ती गन्दै जौबारी छोड्न थाले । हुन त सो क्षेत्रका सशस्त्र प्रहरीको बिओपी स्थापना भइसकेको छ ।
प्रहरी चौकी समेत पुरस्थापना भइसकेको छ । तर बिओपी स्थापना हुँदैमा र प्रहरी चौकी पुरस्थापना हुदैँमा अब सो बजार स्थापना हुनसक्ने स्थितिमा नै छैन ।
त्यहाँ रहेको थोरै व्यापारी पनि किसानले आफूले उत्पादित सरसामान अन्तै लान थालेकाले भएको व्यापार चल्न छोडेको भन्दै आ–आफ्नै ठाउँ पलायन भएको बताइएको छ ।
हाल जौबारी प्रायः सुनसान रहेको स्थानीयवासी थुक्तेन नोर्बु लामाको भनाइ छ । उनले भारतीय व्यापारी विस्थापित भएपछि बजार सुनसान जस्तै भएको बताए । सो बजारमा नेपाल तर्फबाट व्यापारीले समेत चासो नराखेपछि बजार सुनसान बन्दै गएको हो ।
सरकारी क्षेत्रबाट समेत सो क्षेत्रमा चहलपहलका लागि कुनै प्रयास नभएको उनले बताए ।
हुनत् जौबारीमा कृषि अनुसन्धान केन्द्रसमेत स्थापना भएको छ ।
यसरी दिनप्रतिदिन बजार सुनसान हुन थालेसँगै किसानले आफूले भने जस्तो आफ्नो समानको मूल्य पाउन छोडेपछि उत्पादित वस्तु त्यहाँ बिक्रीका लागि लान छोडेका छन् ।
विशेषतः त्यस क्षेत्रका बासिन्दा कृषि क्षेत्रमा लागि परेका छन् । किसानले उत्पादन गरेको घिउ र छुर्पीसमेत त्यस बजारमा महँगो मूल्यमा बिक्री हुने गरेको थियो ।
जौबारीको चहलपहल घटेसँगै घिउ, छुर्पीले पनि बजार पाउन छाडेको छ । किसानले भारतका बजारमा पठाउने घिउ छुर्पीकोसमेत मूल्य कम पाउन थालेपछि त्यस बजारमा उत्पादित बस्तु लैजान छोडेको स्थानीयवासी दावा शेर्पाको भनाइ छ ।
किसानले घिउ छुर्पी तथा कृषि उपज बिक्री गरेर खाद्यान्न मात्र होइन, कपडालगायत अन्य सामग्रीसमेत ल्याउने गरेका थिए । तर हाल बजारमा सामान पनि छैन स्थानीय बजारमा किनमेल भनेर जाने गरेका पनि छैनन् ।
सीमा क्षेत्रमा रहेको जौबारी मात्र होइन, जिल्लामा सञ्चालित अन्य बजारको अवस्थासमेत उस्तै छ । जिल्लाको मानेभञ्ज्याङमासमेत उस्तै भिडभाड हुने गरेको थियो ।
इलामको भारततर्फ जाने मुख्य नाका मानिएको पशुपतिनगरमासमेत चहलपहल कमी नै भएको छ । तर यहाँ किनमेल नै ठप्प भएको भने हैन ।
व्यापारमा कमी आएपछि त्यहाँका व्यापारी विस्थापित हुने खतरा बढेको छ । विशेष गरेर पशुपतिनगरमा हाल कपडाकै व्यापार बढी हुने गरेको छ ।
कपडा मात्र बेचेर बजार कायम रहिरहन नसक्ने व्यापारी पवि राईको भनाइ छ । उनले कहिले व्यापार नै नगरी बेलुका सटर तानेर हिँड्नु परेकोसमेत बताए ।
यो कोरोनापछि अझ व्यापार घटेको छ ।
पलायन हुन लागेका व्यापारीलाई थाम्न सरकारले विशेष प्याकेजका कार्यक्रम ल्याउनुपर्ने स्थानीयवासीको भनाइ छ ।
व्यापारीलाई सहुलियत दरमा ऋणको व्यवस्था मिलाउन सके पनि हदसम्म समस्याको समाधान हुने सो क्षेत्रका व्यापारीको भनाइ छ ।
सूर्योदय नगरपालिकास्थित उद्योग वाणिज्य सङ्घका अध्यक्ष प्रमोद राईलेसमेत सो क्षेत्रमा चहलपहल बढाउन निजी क्षेत्रबाट मात्र सम्भव नभएकाले सरकारी निकायबाट पहल चाल्नुपर्नेमा जोड दिए ।
त्यस क्षेत्रका भारतीय व्यापारी भारत नै फर्किन थालेका छन् भने स्थानीय व्यापारी बिर्तामोड, विराटनगरलगायत स्थानमा जान थालेको व्यापारीको भनाइ छ ।
स्थानीय सरकारले सहुलियतका कार्यक्रम ल्याउन सके पलायन हुन लागेका व्यापारी थामिने व्यवसायीको भनाइ छ ।
बैङ्कहरूसँग सहकार्य गरेर समेत सो कार्यक्रम सञ्चालन हुनुपर्ने उनीहरूको भनाइ छ ।
कोभिड सुरुभएपछि सीमा क्षेत्रमा मात्र हैन, धेरै ठाउँमा यस्तै समस्या भएको व्यापारीको भनाइ छ । तर सीमा क्षेत्रमा कसैको आँखा नपुगेको सो क्षेत्रका व्यापारीको दुखेसो छ ।
कोरोना सङ्क्रमणको बढ्दो जोखिमका कारण यति बेला भारतीय पर्यटकको भीड लाग्ने इलामका पशुपतिनगर, मानेभञ्ज्याङ, छब्बिसे, जौबारी, सन्दकपुरलगायत सीमावर्ती बजार र पर्यटकीय स्थल प्रायः सुनसान भएका छन् ।
युनिकोड
मिति रूपान्तरण
प्रदेश खबर
प्रतिक्रिया