बीपी कोइराला क्यान्सर अस्पतालकी लेखा अधिकृत डेढ लाख घुससहित पक्राउ

चितवन : बीपी कोइराला मेमोरियल क्यान्सर अस्पतालकी लेखा अधिकृत अमृता कोइराला घुससहित पक्राउ परेकी छन् । अख्तियार दुरुपयोग अनुसन्धान आयोग हेटौंडाको टोलीले उनलाई १ लाख ५० हजार रुपैयाँ नगद र ४ लाख ५० हजार रुपैयाँको चेकसहित पक्राउ गरेको हो । चितवनको भरतपुर महानगरपालिका–४ कटहर चोकको एक होटलबाट कोइरालालाई आइतबार पक्राउ गरेको अख्तियारको हेटौंडा कार्यालयका सूचना अधिकारी गोविन्दप्रसाद गौतमले जानकारी दिए । औषधि आपूर्तिकर्तालाई रकम भुक्तानी दिएबापत कोइरालाले घुस मागेको र आइतबार आपूर्तिकर्ताबाट घुस रकम लिँदालिँदै उनलाई पक्राउ गरिएको उनले बताए । पक्राउ परेकी कोइरालामाथि थप अनुसन्धान भइरहेको अख्तियारले जनाएको छ ।