सुनसरी ४: व्यालेट पेपर बिनै मत गनिएको मन्त्री कार्कीको आरोप, एमाले भन्छ हार निश्चित भएपछि बखेडा निकालियो

सुनसरी निर्वाचन क्षेत्र नम्बर ४ का कांग्रेस उम्मेदवार सञ्चार तथा सूचना प्रविधिमन्त्री ज्ञानेन्द्रबहादुर कार्कीले मतगणनाका क्रममा धाँधली भएको आरोप लगाएपछि विवाद उत्पन्न भएको छ । मतगणनाका क्रममा व्यालेट पेपर बिना नै ६०६ मत एमाले उम्मेदवार जगदीशप्रसाद कुसियैतकोमा जोडेको भेटिएपछि विवाद उत्पन्न भएको हो । हाल निर्वाचन अधिकृतको कार्यालयमा सर्वदलीय बैठक बसिरहेको छ । सर्वदलीय बैठकमा विभिन्न दलका उम्मेदवार तथा प्रतिनिधिहरू सहभागी छन् । एमाले केन्द्रिय सदस्य लक्ष्मी गौतमले हार निश्चित भएपछि कर्कीले बखेडा निकालेको आरोप लगाएकी छन् । समस्या पहिले नै उत्पन्न भएको थियो भने पहिले नै नभनेर अन्तिम अवस्थामा भन्नुको तात्पर्य के हो ? इटहरी उपमहानगरपालिकाकी निवर्तमान उपप्रमुख समेत रहेकी गौतमले भनिन् । यता भर्खरै एमालेबाट प्रदेश संसदमा निर्वाचित रेवती रमण मण्डारीले अब पुन मतगणना गर्न नमिल्ने र उक्त कुरा कानुन सम्वत नभएको बताएपछि माहोल केही समयका लागि तातिएको थियो । विवाद उत्पन्न भएपछि त्याहाको सुरक्षा व्यवस्था कडा पारिएको छ । बैठकमा निर्वाचन अधिकृतको कार्यालयले गणना गर्ने कर्मचारीबाट गल्ती भएको स्वीकार गरेको छ । गणना रोकिनुअघि सार्वजनिक भएको परिणाम अनुसार यहाँ कार्की ७१ मतले अघि छन् ।