जनयुद्धले कम्युनिष्ट आन्दोलनलाई बदनाम गरेको छ मन्त्री गुरुङ

काठमाडौँ । सञ्चार तथा सूचना प्रविधि मन्त्री पृथ्वी सुब्बा गुरुङले जनयुद्धले कम्युनिष्ट आन्दोलनलाई बदनाम गरेको बताएका छन् । बुधवार काठमाडौँमा आयोजित २६ औँ यदु स्मृति दिवस तथा २३ औँ यदु स्मृति पत्रकारिता पुरस्कार वितरण समारोहमा बोल्दै उनले जनयुद्ध भनेको कम्युनिष्ट आन्दोलनलाई बदनाम गर्ने एउटा आत्मघाती बाटो भएको भन्दै यसले देशको आर्थिक र सामाजिक सबै क्षेत्रमा ठुलो प्रभाव पारेको बताए । उनले भने, ‘म त जहिले पनि जनयुद्धको विरुद्धमा उभिरहेको छु । जनयुद्ध भनेको कम्युनिष्ट आन्दोलनलाई बदनाम गर्ने एउटा आत्मघाती बाटो हो । हिंसा र विचारमा कुन प्रमुख हुन्छ भन्दा म जहिले पनि विचारको पक्षमा रहने मान्छे हो । धेरै जना माओवादीको आन्दोलनमा होमिए र धेरैले ज्यान पनि गुमाए, कम्युनिष्ट आन्दोलन बदनाम भयो, खर्बौँको सम्पत्ति नोक्सान भयो, आज जुन गाँउहरु रित्तो भएका छन् भन्ने कुरा आउँछ यसको सुरुवात जनयुद्धबाट भएको हो । आर्थिक गतिविधिहरू अवरुद्ध भएको पनि त्यही बेला देखि हो । विकासमा पनि २५ वर्ष पछाडि पर्यौ जनयुद्धले गर्दा नै त्यस कारणले गर्दा यो माओवादी जनयुद्धबाट हामीले सिक्नु पर्ने कुरा के हो भन्दा कुनै पनि क्रान्तिको बाटो र विचार अर्काको नक्कल गरेर गर्नु हुदैँन् ।’ यसको साथै, उनले माओवादीले जनयुद्ध बेचेर नै खाइसकेको भन्दै आज मुलुकको लागि माओवादीको सैद्धान्तिक आधार के हो त भन्दै प्रश्न गरेको छन् । उनले भने, ‘हिंसा भन्ने शब्दबाट किन डराएर भागिरहेको छ माओवादी ?माओवाद भन्ने शब्दबाट किन डराएर भागिरहेको छ ? जनयुद्ध त उनीहरूले बेचेर नै खाइसके । के छ आज माओवादीको सैद्धान्तिक आधार जसले यो मुलुक बनाउन सक्छ । माओवादीले सेना नहुने र हतियार नबोक्ने पार्टी कम्युनिष्ट हुदैँन् भनेर एमाले कम्युनिष्ट होइन भन्ने गरेका थिए तर आज माओवादीसँग पनि सेना छैन उनीहरू कम्युनिष्ट होकी हैन त ।’ यस्तै, स्वतन्त्रता, एकता सबैलाई सुरक्षित राख्नको लागि र गलत क्रियाकलाप रोक्नको लागि सामाजिक सञ्जाल विधेयक आएको पनि उनको भनाई छ । उनले भने, ‘दही जस्तो जमेको मुलुकमा कागती पानी हाल्ने काम भयो त्यो कागती पानी हाल्नेलाई रोक्नु परेन, त्यो रोक्नको लागि पनि सामाजिक सञ्जाल नियमन विधेयक चाहिएको हो । हाम्रो स्वतन्त्रता, एकता सबैलाई सुरक्षित राख्नको लागि र गलत क्रियाकलाप रोक्नको लागि नियम ल्याउनु पर्छ, हाम्रो सामाजिक सञ्जाल विधेयकलाई यसरी बुझ्नु पर्छ ।’