विराटनगरमा मोटरसाइकल चोर्ने गिरोह नै सक्रिय, चोरी पछि सीमावर्ती क्षेत्रमा बिक्री

विराटनगर : विराटनगरमा एउटै गिरोहले निरन्तर मोटरसाइकल चोरी गरिरहेको पत्ता लागेको छ । पछिल्लो ८ दिनमा ८ वटा मोटरसाइकल चोरी भएको थियो । चैत १९ गतेदेखि भइरहेको मोटरसाइकल चोरीमा एउटै गिरोहको संलग्नता रहेको प्रहरीको प्रारम्भिक अनुसन्धानबाट खुलेको हो । मोरङ प्रहरीका प्रवक्ता डीएसपी वेदप्रकाश जोशीका अनुसार चैत लागेपछि नै १० वटा मोटरसाइकल चोरी भइसकेका छन् । मोटरसाइकल चोरी तीव्र हुन थालेपछि मोरङ प्रहरी प्रमुख एसपी नारायणप्रसाद चिमरियाले विशेष ‘अप्रेसन’ चलाए । सक्रियता बढाएको प्रहरी अन्ततः गिरोहसम्म पुग्न सफल भएको छ । जिल्ला प्रहरी कार्यालय मोरङका इन्स्पेक्टर सरोज खनाल र इलाका प्रहरी कार्यालय रानीका इन्स्पेक्टर प्रकाश थापा नेतृत्वको संयुक्त टोलीले गिरोहका २ जनालाई पक्राउ गरेको छ । २ जनालाई पक्राउ गर्दा चोरी भएकामध्ये ६ वटा मोटरसाइकल भेटिएको डीएसपी जोशीले बताए । उनका अनुसार मोटरसाइकल चोरी गरेर सीमावर्ती भारतीय बजार जोगवनीको टिकुलिया बस्तीमा लगेर बिक्री गर्ने गरेको पत्ता लागेको छ । मङ्गलवार पक्राउ परेका २ जनालाई प्रहरीले बुधवार सार्वजनिक गरेको छ । मोटरसाइकल चोरीमा संलग्न विराटनगर महानगरपालिका–१७ का २४ वर्षीय नौसाद अन्सारी र १७ वर्षीय बालकलाई पक्राउ गरिएको जानकारी जोशीले दिए । उनका अनुसार पछिल्लो ६-७ दिनदेखि लगातार मोटरसाइकल चोरीको घटना बढेपछि विशेष निगरानी गर्ने क्रममा दुवै जनालाई पक्राउ गर्न प्रहरी सफल भएको हो । विराटनगर क्षेत्रका अस्पताल, पार्किङ स्थल, होटलको पार्किङ, अदालत, मालपोत कार्यालयलगायत भिडभाड हुने स्थानबाट मोटरसाइकल चोरी धेरै भएको डीएसपी जोशीले बताए । गत मङ्सिर महिना अघिसम्म विराटनगरमा मोटरसाइकल चोरी गर्ने गिरोह सक्रिय थियो । ‘मोटरसाइकल चोरी गर्ने गिरोहका नाइके सुनसरीका नजाम अन्सारी मङ्सिरमा पक्राउ परे । पक्राउ गरेर अन्सारीलाई कानुनी कारबाहीको दायरामा ल्याइएपछि चोरीका घटनामा कमी आएको थियो,’ डीएसपी जोशीले भने, ‘अन्सारीले यहाँ मोटरसाइकल चोरी गर्ने र भारतमा लगेर बिक्री गर्नुका साथै केही पीडितहरूको नम्बर पत्ता लगाएर सम्पर्क गरी मोटरसाइकलको फिरौती रकम माग्ने गरेका थिए । मागअनुसारको रकम दिएपछि मोटरसाइकल फिर्तासमेत गर्ने गरेको पाइयो ।’ अन्सारी चोरी तथा आपराधिक मुद्दामा कारागार चलान भएका छन् । त्यसपछि केही महिना मोटरसाइकल चोरी रोकियो । एक्कासि चैतमा चोरी बढ्यो । अहिले २ जना पक्राउ परेसँगै ६ वटा मोटरसाइकल फेला परेको छ । चोरीका मोटरसाइकल विराटनगर–१५ र सीमावर्ती भारतको टिकुलियाबाट बरामद भएको जोशीले बताए । आपराधिक पृष्ठभूमिका व्यक्तिहरू मोटरसाइकल चोरीमा संलग्न रहेको र पक्राउ गरेर चोरी तथा आपराधिक लाभ मुद्दा चलाउन बुधवार म्याद थप गरेर अनुसन्धानको बाँकी प्रक्रिया अघि बढाइएको मोरङ प्रहरी प्रमुख एसपी नारायणप्रसाद चिमरियाले बताए । गत साउनदेखि मङ्सिरसम्ममा विराटनगरबाट ६० वटा मोटरसाइकल चोरी भएका थिए । तीमध्ये ४ वटा फेला परेका छन् । अरू मोटरसाइकलको खोजी भइरहेको प्रहरीले जनाएको छ । फागुनमा एउटा मोटरसाइकल चोरी भएको थियो । तर, चैतमा मात्रै १० वटा मोटरसाइकल चोरिए । एसपी चिमरियाका अनुसार चोरीमा संलग्न सिटी सफारी चढेर पुग्ने र मोटरसाइकल चोरेर भारततिर भाग्ने गरेको पाइएको छ ।