धनकुटा–अल्पसङ्ख्यक आठपहरियाहरू यति बेला उनीहरूको सबैभन्दा ठुलो वडाङमेट अर्थात् मङ्सिरे चाड धूमधामका साथ मनाइरहेका छन् । आठपहरियाहरू हरेक वर्ष कार्तिक पूर्णिमा देखि १५ दिन सम्म मनाइने मङ्सिरे चाडमा जन्म र मृत्यु पछिका विभिन्न संस्कार गर्छन् । वर्षभरि मृत्यु भएका आफन्तहरूप्रति श्रद्धाञ्जली दिन बरखी बारेका आठपहरियाहरूले कपाल मुण्डन गरी सुनसरीको चतरा स्थित प्रसिद्ध बराह धामको यात्रा गर्छन् ।
पितृ उद्धारकलागि तीन दिनसम्म गरिने कष्टकर पैदल यात्रा पछि बराह भगवानको दर्शन सकेर कोकाहा नदिको सुद्ध जल उठाइ घर फर्कने यो समुदायको परम्परा छ ।
यसरी ल्याइएको जलले घर चोख्याएर मार्ग थानमा स्वस्तीशान्ती गरी जुठो फुकाउने गरिन्छ । जुठो सकेर मौलिक बाद्य बादनकासाथ मुन्धुम गाउँदै मारुनी नाच्ने र परिवारका दिवङ्गत सदस्यहरूको मृत आत्माको चीर शान्ति र भावी सन्ततिको समृद्धिको कामना गर्ने चलन छ । यो समुदायमा मारुनी नाच लोकप्रिय छ । यस्तै पानी, खडेरी र वन्यजन्तुबाट फलफूल र अन्नपात जोगाएर समुदायमा अनिकाल टारेको भन्दै मिष्टान्न भोजन खाँदै आपसमा खुसी साट्ने गरिन्छ । अन्य आदिवासी भन्दा फरक संस्कार–संस्कृति भएका अल्पसङ्ख्यक आठपहरियाहरूको मुख्य थातथलो धनकुटा भए पनि पछिल्लो समय पेसा व्यवसायका क्रममा झापा, इलाम, मोरङ सुनसरी र काठमाण्डौं लगायतका स्थानमा छरिएर रहेका छन् ।
Discussion about this post