राजावादीको आन्दोलन चक्रपथ बाहिरै सीमित गर्न ओलीको निर्देशन

काठमाडौं : प्रधानमन्त्री केपी शर्मा ओलीले जेठ १५ गतेबाट सुरु हुन लागेको राजावादी आन्दोलनलाई चक्रपथभित्र प्रवेश नदिन निर्देशन दिएका छन्। बिहीबार सुरु हुने भनिएको आन्दोलनका सन्दर्भमा सुरक्षा निकायका प्रमुखहरूसँग भएको छलफलमा प्रधानमन्त्री ओलीले उक्त निर्देशन दिएका हुन्।

चारैवटा सुरक्षा निकाय नेपाली सेना, नेपाल प्रहरी, सशस्त्र प्रहरी बल र राष्ट्रिय अनुसन्धान विभागका प्रमुखहरूसँगको सुरक्षा व्रिफिङका क्रममा प्रधानमन्त्री ओलीले आन्दोलनलाई चक्रपथ बाहिरै सीमित राख्न र सो अनुसार सुरक्षा रणनीति बनाउने आदेश दिएका हुन्।

यता, सुरक्षा निकायका प्रमुखहरूले भने आन्दोलनको स्वरूप, सहभागिता र सम्भावित जोखिमको मूल्याङ्कन गरेर मात्र निर्णय लिन सुझाएका थिए। राजतन्त्र र हिन्दूराज्यको माग गर्दै राजावादीहरू अनिश्चितकालीन आन्दोलनको तयारीमा छन्।

साँठगाँठको दिनमा नेकपा एमालेले पनि गणतन्त्र उत्सव मनाउने घोषणा गरेको छ। प्रधानमन्त्री समेत रहेका एमाले अध्यक्ष ओलीले सो दिन काठमाडौंलाई पार्टीको ‘नियन्त्रण’ मा राख्न निर्देशन दिएको बताइएको छ। तर, दुवै पक्षको प्रदर्शन कहाँ हुने भन्ने स्पष्ट भइसकेको छैन, जसले सुरक्षा चुनौती थपिएको छ।