काठमाडौँ महानगरमा ५२ लाख खर्च अनियमितता : मेयर बालेनको विदेश भ्रमणमा समेत प्रश्न उठ्यो

काठमाडौँ : महालेखापरीक्षकको कार्यालयले काठमाडौँ महानगरपालिकामा आर्थिक वर्ष २०८०/८१ मा ५२ लाख रुपैयाँभन्दा बढी खर्च अनियमितता भएको पाइएको जनाएको छ। मंगलवार सार्वजनिक गरिएको वार्षिक प्रतिवेदनमा उल्लेख गरिएअनुसार मेयर बालेन शाहसहित महानगरका कर्मचारीहरूले विदेश भ्रमणका क्रममा गरेको खर्चमा ठूलो अनियमितता देखिएको हो।

प्रतिवेदन अनुसार पेरिस (फ्रान्स), ब्राजिल, भारत र बंगलादेशमा गरिएको भ्रमणका क्रममा कुल ५२ लाख ५४ हजार ७७ रुपैयाँ ७५ पैसा अनियमित रूपमा खर्च गरिएको उल्लेख छ। महालेखापरीक्षकको प्रतिवेदनमा बालेन शाहले विदेश भ्रमणका लागि आवश्यक स्वीकृति नलिई गएको तथ्य पनि उल्लेख गरिएको छ।

त्यसैगरी, आन्तरिक पर्यटन तथा भ्रमण कार्यक्रममा समेत पारदर्शिता नदेखिएको र खर्च विवरण स्पष्ट नभएको भन्दै त्यसमा पनि अनियमितता भएको ठहर गरिएको छ।

यस विषयमा अहिलेसम्म काठमाडौँ महानगर वा मेयर बालेनको तर्फबाट कुनै आधिकारिक प्रतिक्रिया आएको छैन।