दुर्गा प्रसाईं धरौटीमा रिहा, तीनकुने घटनाका अन्य ३ जना पनि छोडिने

काठमाडौं : उच्च अदालत पाटनले मेडिकल व्यवसायी दुर्गा प्रसाईंलाई धरौटीमा रिहा गर्न आदेश दिएको छ। सोमबार न्यायाधीशद्वय सुदर्शनध्वज भट्ट र मुनेन्द्र प्रसाद अवस्थीको इजलासले उक्त आदेश जारी गरेको हो।

अदालतले बैंकिङ कसुरमा २५ लाख रुपैयाँ र राज्यविरुद्धको अभियोगमा ३ लाख ५० हजार रुपैयाँ धरौटीमा रिहा गर्न आदेश दिएको हो। तीनकुनेमा भएको घटनासम्बन्धी मुद्दाका लागि मात्रै ३ लाख ५० हजार रुपैयाँ धरौटी मागिएको छ।

उक्त घटनामा पक्राउ परेका ७ जनामध्ये ४ जनाले उच्च अदालतमा पुनरावेदन गरेका थिए। तीमध्ये प्रसाईंसहित सबै ४ जनालाई धरौटीमा छाड्ने आदेश भएको छ। बाँकी ३ जनाको तर्फबाट पुनरावेदन नहुँदा उनीहरू हालसम्म हिरासतमा नै छन्।

तीनकुने घटनापछि पक्राउ परेका प्रसाईंमाथि राज्यविरुद्धको अपराध, बैंकिङ कसुर तथा सार्वजनिक व्यवस्था अवरोधजस्ता अभियोगमा मुद्दा दायर गरिएको थियो।