कुवेतमा १३ नेपालीसहित २३ जनाको मृत्युपछि मदिरा उद्योगमा कारबाही

कुवेतमा विषाक्त मदिरा सेवनका कारण १३ नेपालीसहित २३ जना आप्रवासी कामदारको ज्यान गएपछि त्यहाँको सुरक्षा निकायले अवैध मदिरा उत्पादन र वितरणमा संलग्न सञ्जालविरुद्ध ठूलो अभियान चलाएको छ ।

दुई साताअघि भएको घटनामा १६० भन्दा बढी बिरामी परेका थिए । त्यसलगत्तै कुवेती अधिकारीहरूले अवैध मदिरा उत्पादन गर्ने कारखानाहरूलाई रसायन आपूर्ति गर्ने प्रमुख गोदाम अल–राई क्षेत्रमा छापा मारेर नियन्त्रणमा लिएका छन् । हावाली अनुसन्धान विभाग अन्तर्गतको आपराधिक अनुसन्धान शाखाले सञ्चालन गरेको उक्त कारबाहीमा ३४० भन्दा बढी प्लास्टिक कन्टेनरमा भण्डारण गरिएका विषाक्त रसायन बरामद भएका थिए ।

गोदाम हाल इजिप्टमा रहेका एक नागरिकको स्वामित्वमा रहेको पाइएको छ । उनीविरुद्ध कानुनी कारबाहीका लागि इजिप्टका अधिकारीहरूसँग समन्वय भइरहेको अरब टाइम्सले उल्लेख गरेको छ ।

जीवन–सम्पत्तिमा खतरा

बरामद गरिएको विषाक्त रसायन असुरक्षित स्थानमा जथाभावी राखिएकोले आगलागी वा विस्फोटको उच्च जोखिम रहेको अधिकारीहरूले जनाएका छन् । चुहावट भएमा विषाक्त ग्यास वा वातावरणीय प्रदूषण फैलने खतरा समेत थियो । यस जोखिमलाई नियन्त्रण गर्न जनरल फायर फोर्सले स्थल सुरक्षित गरेको बताइएको छ ।

आप्रवासीमाथि कारबाही

यसैबीच, फरवानिया सुरक्षा निर्देशनालयले छापा मार्ने क्रममा ५२ जना आप्रवासीलाई पक्राउ गरेको छ । उनीहरू आवासीय कानुन उल्लङ्घन र अवैध मदिरा व्यापारमा संलग्न रहेको आरोपमा पक्राउ परेका हुन् ।

यस्तै, हसावी र जलीब अल–शुयुख क्षेत्रहरूमा स्थानीय रूपमा उत्पादन गरिएको रक्सी प्रचार–प्रसार गरेको अभियोगमा तीन जना आप्रवासी पक्राउ परेका छन् । उनीहरूको साथबाट बिक्रीका लागि तयार २३ बोतल रक्सी बरामद गरिएको छ । पक्राउ परेकाले आफ्नै निवासमा रक्सी उत्पादन गरी ग्राहकलाई बिक्री गरेको स्वीकार गरेका छन् । उनीहरूलाई कालोसूचीमा राखी देशनिकाला गरिने कुवेती अधिकारीहरूले बताएका छन् ।

२५८ जना पक्राउ

गृहमन्त्रालयले हालसम्म आवासीय र श्रम कानुन उल्लङ्घन गरेको आरोपमा २५८ जना आप्रवासीलाई पक्राउ गरिएको जनाएको छ । पक्राउ परेकामध्ये नेपाली, भारतीय, बंगलादेशीसहित विभिन्न देशका आप्रवासी रहेका छन् ।

कुवेती सञ्चारमाध्यमहरूले अवैध मदिरा उत्पादन र वितरणको मूल जड तहसनहस गर्न सुरक्षाकर्मी सफल भएको जनाएका छन् ।