एनपिएल : लुम्बिनी र पोखरा तथा सुदूरपश्चिम र जनकपुर भिड्दै

काठमाडौँ : राजधानीमा जारी दोस्रो संस्करणको नेपाल प्रिमियर लिग (एनपिएल)मा आज पनि दुई खेल हुँदैछन्।

त्रिभुवन अन्तर्राष्ट्रिय क्रिकेट रङ्गशालामा ११:४५ बजे हुने पहिलो खेलमा लुम्बिनी लायन्स र पोखरा एभेन्जर्स भिड्नेछन्। अपराह्न ४:०० बजे हुने दोस्रो खेलमा साबिक विजेता जनकपुर बोल्ट्स र साबिक उपविजेता सुदूरपश्चिम रोयल्स आमनेसामने हुनेछन्।

रोहित पौडेलको कप्तानीमा रहेको लुम्बिनीले चारमध्ये एक खेल जितेको छ भने कुशल भुर्तेलको कप्तानीमा रहेको पोखराले तीन खेलबाट एक जित हात पारेको छ। लुम्बिनी अङ्क तालिकामा सातौँ र पोखरा छैटौँ स्थानमा छन्। प्लेअफको सम्भावना जोगाउन दुवै टोलीका लागि आजको खेल अनिवार्यजस्तै बनेको छ।

अपराह्न हुने दोस्रो खेलमा जनकपुर सुदूरपश्चिमसँग भिड्नेछ। तीन खेल खेले पनि अङ्कविहीन जनकपुर पहिलो जितको खोजीमा छ। अन्तिम स्थानमा रहेको जनकपुरले आज पनि हार बेहोरे प्लेअफ दौडबाट बाहिरिन सक्छ।

उता अपराजित सुदूरपश्चिमले चारवटै खेल जितेर अङ्क तालिकाको शीर्षस्थानमा कब्जा जमाइरहेको छ। आजको खेल जितेर ऊ प्लेअफ स्थान सुनिश्चित गर्न चाहन्छ। गत संस्करणको फाइनलमा जनकपुरसँग हार व्यहोरेको सुदूरपश्चिम यसपटक त्यसको बदला लिन पनि उतावला देखिन्छ।