जनकपुरबाट आएको बस धरानमा दुर्घटना हुँदा पाँच जनाको मृत्यु, १३ जना घाइते (तस्बिरहरुसहित)

इटहरी : धनकुटाबाट धरानतर्फ आउँदै गरेको को १ ख ७११९ नम्बरको यात्रुबाहक बस धरानको जिरो पोइन्टमा दुर्घटना हुँदा पाँच जनाको मृत्यु भएको छ भने१३ जना घाइते भएका छन्।

प्रहरीका अनुसार ब्रेक फेल भई तीव्र गतिमा अनियन्त्रित भएको बस सडक किनारमा पल्टिएको हो। 

दुर्घटनामा तीन पुरुष र दुई महिलाको ज्यान गएको छ। घाइतेहरूलाई तत्काल उद्धार गरी धरानस्थित बीपी कोइराला स्वास्थ्य विज्ञान प्रतिष्ठानमा उपचारका लागि भर्ना गरिएको छ, जहाँ केहीको अवस्था गम्भीर रहेको प्रहरीले जनाएको छ। 

दुर्घटनामा बसले जिरो प्वाइन्टमा रहेको औषधि पसल ‘न्यु शबा मेडिकल’मा ठक्कर दिँदा पसलसमेत क्षतिग्रस्त भएको छ। शैक्षिक संस्थाको बस भएपनी मृतकहरू विद्यार्थी जस्तो नभएको जिल्ला प्रहरी कार्यालय सुनसरीका डिएसपी चन्द्र खड्काले प्रदेश खबरलाई बताए ।  

दुर्घटनाग्रस्त बसमा जनकपुर लेखिएको बोर्ड भेटिएकाले बसमा सवार मानिसहरू जनकपुरबाट आएको प्रहरीले बताएको छ ।  

हालसम्म मृतकहरूको पहिचान खुल्न सकेको छैन। मृतक र घाइतेहरू बसका यात्रु हुन् वा दुर्घटना भएको ठाउँमा किचिएका हुन् भन्ने एकिन हुन बाकीँ रहेको प्रहरीले जनाएको छ ।  प्रहरीले घटनाको विस्तृत अनुसन्धान सुरु गरेको जनाएको छ। 

यसअघि प्रकाशित समाचारमा '१३ जना घाइते' हुनुपर्नेमा अन्यथा भएकाले सच्याइएको छ - सम्पादक