वीपी प्रतिष्ठानको शिक्षाध्यक्षमा प्रा.डा.सञ्जिवकुमार शर्मा नियुक्त

वीपी कोइराला स्वास्थ्य विज्ञान प्रतिष्ठान धरानको शिक्षाध्यक्षमा प्रा.डा.सञ्जिवकुमार शर्मालाई नियुक्त गरिएको छ । काम चलाउ सरकार भएकै बेला स्वास्थ्य तथा जनसङ्ख्या मन्त्री भवानी खापुङले प्रा.डा.शर्मालाई शिक्षाध्यक्षमा नियुक्त गरेका हुन् । प्रा.डा.गुरु खनालको कार्यकाल सकिएपछि उक्त पद रिक्त रहेको थियो । वरिष्ठ चिकित्सक डा।शर्माको नियुक्तीसँगै प्रतिष्ठानमा चारै जना पदाधिकारीले पुर्णता पाएको छ । नवनियुक्त रेक्टर प्रा.डा.शर्मालाई आजै कार्यालयमा स्वागत कार्यक्रम राखिएको प्रतिष्ठानका सहप्रवक्ता डा।चुडामणी पोखरेलले जानकारी दिए । प्रा.डा.शर्मा वरिष्ठ मुटु रोग, मृगौला रोग र सर्पदंशका बिशेषज्ञ हुन् । अन्तराष्ट्रियरुपमा ख्याती कमाएका उनी सेवाग्राहीबीचमा पनि चर्चित डाक्टर हुन् । केएचडिसि कार्यक्रम मार्फत उनले वस्ती वस्तीमा पुगेर निःशुल्क उपचार सेवा पुर्याउने गरेका छन् । समुदायस्तरमा पुगेर गरिने यो कार्यक्रमले मृगौला, सुगर, प्रेसर, उच्च रक्तचापबाट सर्वसाधारणहरुलाई सचेत गराउनुका साथै रोग लाग्नबाट जोगाउन महत्वपुर्ण योगदान पुर्याएको छ ।