पाँचथरमा धान भर्न खेतमा जनप्रतिनिधि

पाँचथर / पाँचथरको फाल्गुनन्द गाउँपालिकाका जनप्रतिनिधि र कर्मचारी मङ्सिर २२ गतेदेखि किसानका खेतमा पुगेर धान लेखाजोखा गर्न व्यस्त छन् । एक याममा ५० मुरीभन्दा धेरै धान फलाउनेलाई प्रोत्साहन स्वरूप पुरस्कार दिने नीति ल्याएपछि गाउँपालिकाका जनप्रतिनिधि पुरस्कार दाबी गर्ने किसानको खेत र खलामा धान भर्न व्यस्त भएका हुन् ।

गत असार १० गते सम्पन्न गाउँ सभाबाट एक याममा ५० मुरीभन्दा धेरै धान फलाउने किसानलाई नगद ३० हजार रुपियाँ र एक सय मुरीभन्दा धेरै फलाउनेलाई ५० हजार रुपियाँसहित सम्मान गर्ने कार्यविधि पारित गरेको थियो । गाउँपालिकाले सो मापदण्ड अनुसार धान फलाउने किसानलाई दाबी पेस गर्न आह्वान गरेको थियो । जस अनुसार गाउँपालिकाभरिका ४२ जना किसानले पुरस्कारका लागि योग्य भएको दाबीसहित निवेदन दिएका थिए ।

दाबी पेस गरेका किसानको धान अनिवार्य लेखाजोखा गरेर सार्वजनिक मुचुल्का उठाएर मात्रै पुरस्कार दिनुपर्ने भएकाले जनप्रतिनिधि र कर्मचारी सामूहिक रूपमा धान भर्ने पाथी र डिजिटल तराजु बोकेर किसानका घरमा पुग्ने गरेको गाउँपालिका अध्यक्ष बृजहाङ आङदेम्बेले बताए। उनका अनुसार पुरस्कारका लागि दाबी गरेका अधिकांशले मापदण्ड अनुसार धान फलाएको पाइएको छ ।

किसानले ५० मुरीदेखि १८५ मुरीसम्म धान फलाएको दाबी पेस गरेका थिए । “हालसम्म नाप जाँच गरिएकामध्ये वडा नं। ७ का गणेशकुमार चेम्जोङले ११६ मुरी धान फलाएको पुष्टि भएको छ भने वडा नं १ का मकर तामाङले १८५ मुरी फलाएको भन्दै निवेदन दिएका छन । तामाङको धान भर्न केही समय लाग्ने देखिन्छ,” अध्यक्ष आङदेम्बेले भने ।

फाल्गुनन्द गाउँपालिकामा सात वटा वडा छन् । सबै वडामा धान फल्छ । बसाइँसराइ र जनशक्ति अभावका बाबजुद खेती गरिरहेका किसान धेरै अन्न फलाउँदा पुरस्कृत हुने भएपछि निकै नै उत्साही छन् ।

वडा नं. ७ का गणेशकुमार चेम्जोङले भने, “हातखुट्टा लागेदेखि खेतीपाती गरियो, सरकारका प्रतिनिधिले यसरी खलामा आएर कहिल्यै हाम्रो कमाइ हेरेका थिएनन् । यस पटक जनप्रतिनिधि र कर्मचारी एकैसाथ आएर धान भर्दै पुरस्कारका लागि योग्य भएको घोषणा गर्दा धेरै नै खुसी भएको छु ।” अर्को वर्ष बाँझिएको बाँकी खेतमा धान रोपेर दुई सय मुरी फलाउने उनको अठोट छ ।

चेम्जोङले यस पटक १०१ मुरी धान फलाएको दाबी गर्दै पुरस्कारका लागि निवेदन दिएका छन। उनिको खलामा पुगेर भर्दा दाबीभन्दा १५ मुरी धेरै कुल ११६ मुरी धान भेटिएको प्रमुख प्रशासकीय अधिकृत निर्मल तुम्रोकले बताए ।

मापदण्ड अनुसारको धान फलाएका किसानको खला र खेतमा पुगेर धान भर्ने काम अन्तिम चरणमा पुगेको गाउँपालिकाले जनाएको छ । ५० मुरीभन्दा धेरै धान फलाएका सबै किसानलाई गाउँपालिकाले सार्वजनिक कार्यक्रममा आह्वान गरेर सामूहिक सम्मानसहित नगद दिएर पुरस्कृत गर्ने गाउँपालिकाको तयारी छ ।

आजको गोरखापत्र दैनिकमा प्रकाशित भएको छ ।