जापान पठाइदिन्छु भन्दै ४१ जना युवाको तीन करोडभन्दा बढी रकम ठगी गरेर एउटा गिरोह फरार भएको छ ।
ठगी पर्नेमा मोरङका ४० जना नै राजवंशी समुदायका र झापाका एक जना छन् ।
उनीहरूलाई वैदेशिक रोजगारको नाममा ठगी धन्दा चलाएर सुनवर्षी ३ का ३६ वर्षीय अजय राजवंशीसहितको गिरोहले तीन करोड रुपैयाँ भन्दा धेरै ठगी गरी फरार भएको हो ।
अजयसहित उनका भाइ रन्जित राजवंशी, बुहारी अनुराधा र चितवनका राजेन्द्र अधिकारी संलग्न रहेको पीडितहरूले बताएका छन् । पीडितहरूका अनुसार राजेन्द्र र अजय जापानको गार्मेन्ट उद्योगमा काम गरेर फर्किएका थिए ।
अजयले उठाएको रकम लिएर मुख्य योजनाकार भनिएका राजेन्द्र पुनः जापान गएको खुलेको छ । अजयसहित उनका भाइबुहारी रन्जित–अनुराधा र बहिनी विद्या फरार छन् ।
पीडितहरुले वैदेशिक रोजगार विभागमा पुस २८ गते राजेन्द्र अधिकारीविरुद्ध उजुरी दिएका छन् । विभागले वैदेशिक रोजगारसँग सम्बन्धित नभई ठगी कसुर गरेको देखिएको भन्दै प्रहरीको केन्द्रीय अनुसन्धान ब्यूरोमा पत्राचार गरेको छ ।
पीडितहरूले जापान जाने लोभमा उनीहरूलाई दुई लाखदेखि १८ लाखसम्म बुझाएका छन् ।
‘जग्गा धितो राखेर ऋण खोजेर पैसा बुझाएँ,’ ठगीमा परेका विवेक राजवंशीले बिहीबार विराटनगरमा पत्रकार सम्मेलनका क्रममा भने, ‘अहिले आएर विदेश पठाउने आश्वासन दिएको अजय नै सम्र्पकविहीन भएको छ ।’
एकै व्यक्तिबाट धेरै जना ठगिएका उजुरी आउने क्रम बढेको मोरङका प्रमुख जिल्ला अधिकारी काशीराज दाहालले बताए ।
रोजगारको क्रममा ठगिएको उजुरी आए वैदेशिक रोजगार ऐन, २०६४ ले दिएको अधिकार प्रयोग गरी कारबाहीको दायरामा ल्याउने उनको भनाइ छ ।
प्रदेश खबर
प्रतिक्रिया