सहकारी ठगी : धरानको बराह बचतका नौ जना पक्राउ, अदालतबाट चार दिन म्याद थप

धरान : धरानमा रहेको बराह बचत तथा ऋण सहकारी संस्था लिमिटेडमा रकम हिनामिना प्रकरणमा प्रतिवादी नौ जनालाई प्रहरीले पक्राउ गरेको छ । प्रहरी स्रोतका अनुसार सहकारी ठगी मुद्दामा शनिबार प्रतिवादीहरूलाई पक्राउ गरिएको हो । पक्राउ पर्नेमा धरान उपमहानगरपालिका वडा नं. ७ घर भएकी अन्दाजी ४० वर्षीया फूलकुमारी राई, विराटनगर ३ घर भई धरान ७ बस्ने ७३ वर्षीया विष्णु कुमारी तुलाधार, धरान १६ बस्ने अन्दाजी ६८ वर्षीय श्रीमान महत क्षेत्री, धरान १५ बस्ने ३१ वर्षीया अस्मिता भण्डारी, धरान १२ बस्ने ३७ वर्षीय सुमिन बिक रहेका छन् । यसैगरी धरान ११ बस्ने जतनमाया विश्वकर्मा, धरान १३ बस्ने ४२ वर्षीया सरिता कालिकोटे, जसमा जतनमाया बराह बचतका सञ्चालक मानबहादुर विश्वकर्माकी पत्नी हुन् । यसैगरी सरिता अर्का सञ्चालक गंगाबहादुर कालिकोटेकी पत्नी हुन् । यसैगरी रवि भने सहकारीका व्यवस्थापक हुन् । प्रहरी स्रोतका अनुसार अपना भने सहकारीकी लेखा प्रमुख कर्मचारी रहेको खुलेको छ । पीडितहरूले प्रहरीमा दिएको जाहेरीका आधारमा सञ्चालक र कर्मचारीहरूलाई पक्राउ गरिएको हो । जसमध्ये सुमिन सहकारीका उपसमिति संयोजक तथा लेखा सुपरीवेक्षक हुन् । यसैगरी फूलकुमारी, विष्णुकुमारी, श्रीमान महत सहकारीको सञ्चालक समिति सदस्य रहेको खुलेको छ । यसैगरी अस्मिता भने उपसमिति सदस्य रहेको अनुसन्धानबाट खुलेको छ । उनीहरूलाई विभिन्न स्थानबाट पक्राउ गरेको प्रहरीले जनाएको छ । प्रहरीकाअनुसार पक्राउ परेकामध्ये आठ जनालाई जिल्ला अदालत सुनसरीबाट चार दिनको म्याद थप गरिएको छ भने एकजनालाई म्याद थप गर्ने तयारी छ । बराह सहकारी समितिको प्रतिवेदनमा बराहका सञ्चालकहरू मानबहादुर विश्वकर्मा, ग‌ङ्गाबहादुर कालिकोटे, विष्णुमाया कालिकोटे, विष्णुकुमारी तुलाधर, अमरबहादुर विश्वकर्मा, शुभराज खातीलगायतले १० करोड ४७ लाख २९ हजार दुई सय ७३ रुपैयाँ आफै ऋण लिएको उल्लेख छ । बराह ग्रुप अफ कम्पनीका अध्यक्ष शिव लामिछाने, सहकारीका अध्यक्ष मानबहादुर विश्वकर्मा, ऋण समिति संयोजक गंगा कालिकोटे, सञ्चालक सदस्य अमरबहादुर विक लगायत भने फरार रहेको प्रहरीले जनाएको छ । सहकारी ठगीमा संलग्न रहेका अरूहरूको खोजी भइरहेको प्रहरीको भनाइ छ । खासगरी संसदीय छानबिन समितिका सभापति सूर्य थापा संयोजक रहेको छानबिन समितिले बराह सहकारीमा बचतकर्ताको रकम हिनामिना भएको प्रतिवेदन सार्वजनिक गरेको थियो ।