भ्वाइस युनिभर्स र डान्स युनिभर्सको पूर्वी अडिसन सुरू

झापा : नेपाली प्रतिभाहरू प्रतिस्पर्धा हुने दुई रियालिटी शो मेरो भ्वाइस युनिभर्स र मेरो डान्स युनिभर्सको पूर्व क्षेत्रका लागि तय भएको अडिसन शनिबार सुरू भएको छ । यसैबीच प्रतिस्पर्धीहरूको भीडभाडका बीच पूर्वका दुई स्रष्टाहरू गीतकार शिवशंकर थापा र गायक कुवेर राईसहित आयोजक संस्था इन्ट्रा नेशनल वेलफेयर एण्ड सपोर्ट फाउण्डेसन अफ अमेरिकाका अध्यक्ष डिल्ली अधिकारीले उद्घाटन गरेका थिए । अधिकारीले नेपाली संगीत क्षेत्रमा स्थापित स्रष्टाद्धयलाई पुष्पगुच्छा एवं नगद रकमले सम्मान गरेका थिए । अधिकारीले नेपालीपन र नेपाली पहिचानलाई विश्वभर रहेका नेपालीजनमा जीवन्त राख्न, अर्को पुस्तामा पनि नेपाली संस्कृतिलाई पुस्तान्तरण गर्न र विश्वभरका नेपालीलाई नेपाली कला संस्कृतिका माध्यमबाट नेपालसँग जोड्नका लागि यी दुई रियालिटी शोहरू आयोजना गरिएको बताए । मेरो भ्वाइस युनिभर्स र मेरो डान्स युनिभर्स पूर्वी क्षेत्र अडिसनका संयोजक रूपक ओडारीकाअनुसार दुवै शो का लागि एक हजार एक सय ४३ प्रतिभाहरूले प्रतिस्पर्धाका लागि नाम दर्ता गराएका छन् । पहिलो दिन शनिवार विर्तामोडको ग्रीन फिल्ड स्कूलमा बिहान ११ बजेदेखि सुरू भएको अडिसनमा करिब ६ सय प्रतिभाहरूले प्रतिस्पर्धा गरेका छन् । बाँकी प्रतिस्पर्धीहरूले आइतबार सहभागिता जनाउनेछन् । आयोजक संस्थाका राजेश घतानीका अनुसार इच्छुक प्रतिभाहरूले सिधै अडिसनस्थलमै गएर पनि नाम दर्ता गराउन सक्ने व्यवस्था भएकाले सहभागीहरूको संख्या बढेको छ । संसारभरका नेपाली प्रतिभाहरूबीच प्रतिस्पर्धा गराउने यी दुई रियालिटी शो हरूको लण्डन, पोर्चुगल, अष्ट्रेलिया, जापान, थाइल्याण्ड, हङकङ, दुबई, कतार, मुम्बई र सिलगुडीका अडिसनहरू सम्पन्न भइसकेका छन् । नेपालमा पनि पोखरा र नेपालगञ्जका अडिसनहरू समापन भएका छन् भने बिर्तामोडपछि चैत्र १६ र १७ गते काठमाडौंमा अडिसन हुने बताइएको छ । प्रथम हुनेले एक करोड, उपविजेताले २५ लाख र तेस्रो हुनेले १० लाख रकम पाउने आयोजकको दाबी छ ।