नेदरल्याण्डसविरुद्ध ब्याटिङ गर्दै नेपाल, टीममा तीन परिवर्तन

आइसीसी एकदिवसीय क्रिकेट विश्वकप लिग-२ अन्तर्गत आज नेपालले नेदरल्याण्डसको सामना गर्दैछ ।

यस खेलमा नेदरल्याण्डसले टस जितेर पहिला बलिङ गर्ने निर्णय गरेको छ । योसंगै यस खेलमा नेपालले पहिला ब्याटिंग गर्ने भएको छ । नेपालले यस सिरिजमा पहिलो पटक ब्याटिंग गर्न लागेको छ ।

यस खेलमा नेपालले तीन परिवर्तन गरेको छ । नेपालले आज सोमपाल कामी, गुलशन झा र आसिफ सेखलाई बाहिर राख्दै नन्दन यादव, बसिर अहमद र अनिल शाहलाई अवसर दिइएको छ ।

नेदरल्याण्डसविरुद्ध खेल्ने नेपाली टिम:   

रोहित पौडेल (कप्तान), दीपेन्द्रसिंह ऐरी (उपकप्तान) कुशल भुर्तेल, अनिल शाह, भीम सार्की, आरिफ शेख, बसिर अहमद, नन्दन यादव, ललित राजवंशी, सन्दीप लामिछाने र करण केसी रहेका छन् ।

नेपालले यस सिरिजमा यसअघि खेलेका तीन मध्ये २ खेल जितेको छ भने एक खेलमा हार बेहोरेको छ । नेपालले पहिलो खेलमा स्कटल्याण्डविरुद्ध एक विकेटको रोमाञ्चक जित हासिल गरेको थियो भने दोस्रो खेलमा नेदरल्याण्डसविरुद्ध ५ विकेटको जित निकालेको थियो । त्यस्तै तेस्रो खेलमा स्कटल्याण्डविरुद्ध २ रनको झिनो अन्तरको हार बेहोरेको थियो ।   

नेपाल र नेदरल्याण्डसबीच अहिलेसम्म ६ एकदिवसीय खेल भएका छन् । जसमा नेपालले ३ खेल जितेको छ भने नेदरल्याण्डसले पनि ३ खेलनै जितेको छ ।  

हाल लिग-२ को अंक तालिकामा नेपाल १५ खेलमा १० अंकसहित सातौं स्थानमा रहेको छ । नेपालले १५ खेलमा ४ खेल जितेको छ भने ९ खेलमा हार बेहोरेको छ र २ खेलको नतिजा आएको छैन । त्यस्तै नेदरल्याण्डसको २२ खेलमा २६ अंक रहेको छ र हाल दोस्रो स्थानमा रहेको छ ।