इटहरी पोखरीमा डुबेर सञ्जिवको गयो ज्यान

इटहरी : सुनसरीको इटहरी उपमहानगरपालिका–१८ डकाहास्थित पोखरीमा डुबेर एक जनाको ज्यान गएको छ। आफ्नै माछा पोखरीमा माछा मार्ने क्रममा डुबेका स्थानीय ४८ वर्षीय सञ्जिव चौधरीको मृत्यु भएको हो।

प्रहरीका अनुसार चौधरी आज साँझ करिब ६ बजे पोखरीमा डुबेर बेपत्ता भएका थिए। घटनापछि सशस्त्र प्रहरी बल नेपाल नं १ बराह बाहिनी मुख्यालयबाट खटिएको गोताखोर तथा विपद् व्यवस्थापन टोलीले खोजी कार्य थालेको थियो।

गोताखोर टोलीले साँझ करिब ७ः३० बजे चौधरीको शव पोखरीमै फेला पारेको सशस्त्र प्रहरी बल नेपाल नं ४ गण मुख्यालय सुनसरीका प्रमुख निर्मलकुमार थापाले जानकारी दिए ।