बाढीपहिरो पीडितलाई तत्काल ५० हजार रुपैयाँ दिने सरकारको निर्णय

काठमाडौं । अविरल वर्षाका कारण असोज ११ र १२ गते देशभर विभिन्न स्थानमा आएको बाढी र पहिरोले व्यापक जनधनको क्षति पुर्‍याएपछि सरकारले प्रभावित परिवारलाई तत्काल राहतस्वरूप ५० हजार रुपैयाँ उपलब्ध गराउने निर्णय गरेको छ।

प्रधानमन्त्री सुशीला कार्कीको अध्यक्षतामा मङ्गलवार बसेको राष्ट्रिय विपद् जोखिम न्यूनीकरण तथा व्यवस्थापन राष्ट्रिय परिषद्को बैठकले बाढीपहिरो पीडितको आवास पुनर्निर्माणका लागि तत्कालीन राहत उपलब्ध गराउने निर्णय गरेको हो।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख दिनेश प्रसाद भट्टका अनुसार, बैठकले विपद् प्रभावितलाई राहत कार्य प्रभावकारी बनाउन, क्षतिग्रस्त संरचनाको पुनर्निर्माण, अस्थायी तथा स्थायी वासस्थानको व्यवस्था लगायतका तत्काल गरिने कार्यहरू तय गरेको छ।

भट्टका अनुसार, घर भत्किएका परिवारलाई अस्थायी आवास निर्माणका लागि प्राधिकरणमार्फत ५० हजार रुपैयाँ तत्काल उपलब्ध गराइनेछ। उनले भने, “राहत वितरण प्राधिकरणको मापदण्डअनुसार हुनेछ, साथै बाढीपहिरोमा परी मृत्यु भएका, बेपत्ता भएका र घाइतेलाई दिने रकम पनि तत्काल निकासा गरिनेछ।”

बैठकले जनधनको क्षतिप्रति दुःख व्यक्त गर्दै बेपत्ताहरूको खोज तथा उद्धार कार्यलाई निरन्तरता दिने निर्णय पनि गरेको छ। साथै, सडक, खानेपानी, विद्युत्, सञ्चारजस्ता अत्यावश्यक सेवा सञ्चालन गर्न सङ्घ, प्रदेश र स्थानीय निकायबीच समन्वय गरी केन्द्र सरकारले सहयोग गर्ने निर्णय भएको भट्टले जानकारी दिए।

त्यस्तै, विपद्‌पछि रोग र महामारी फैलिन सक्ने सम्भावनालाई ध्यानमा राख्दै सङ्घ र प्रदेश सरकारका स्वास्थ्य मन्त्रालयहरूले संयुक्त पहलमा नियन्त्रण तथा रोकथामका लागि आवश्यक काम गर्ने निर्णय भएको छ।

बैठकले इन्साराग (अन्तर्राष्ट्रिय खोज उद्धार मापदण्ड) अनुसार सुरक्षा निकायलाई आवश्यक तालिम र पूर्वाधार व्यवस्थापन गर्ने तयारी अघि बढाउने निर्णय गरेको पनि कार्यकारी प्रमुख भट्टले बताए।