सुनसरीमा ह्याकरले प्रहरी प्रमुखकै नाममा पठायो म्यासेज : “रकम पठाइदिनुस्, पछि फिर्ता गर्छु”

धरान : जिल्ला प्रहरी कार्यालय सुनसरीका प्रमुखको ह्वाट्सएप अकाउन्ट ह्याक भएको छ। ह्याकरले प्रहरी प्रमुखकै नाममा रहेको सो नम्बर प्रयोग गरी स्थानीय व्यापारी र सर्वसाधारणलाई म्यासेज पठाई रकम माग्ने कार्य भइरहेको प्रहरीले जनाएको छ।

जिल्ला प्रहरी कार्यालयका अनुसार, प्रमुखले प्रयोग गर्दै आएको ९८५२०८५५५५ नम्बरको ह्वाट्सएप अकाउन्ट गत शुक्रबार राति करिब ८ः४५ बजे ह्याक भएको हो। ह्याकपछि सो नम्बरबाट व्यापारीहरूलाई विभिन्न बहानामा रकम माग्ने म्यासेज पठाइएको पाइएको छ।

‘जुम मिटिङ गर्ने भन्दै फोन आएको थियो’

प्रहरी उपरीक्षक केशवकुमार थेबेका अनुसार, ह्याकिङको प्रारम्भिक कारण विदेशबाट आएको फोनसँग सम्बन्धित हुनसक्छ।

“गत शुक्रबार मेरो नम्बरमा नेपालबाहिरबाट फोन आएको थियो। फोन गर्नेले ‘कोशीको सम्बन्धमा जुम मिटिङ गर्नु छ’ भने। सुरुमा केही शङ्का लाग्यो, तर केही समयमै मेरो ह्वाट्सएप अनधिकृत रूपमा प्रयोग हुन थालेको देखेँ र ह्याक भएको पुष्टि भयो,” उनले भने।

थेबेले भने, “ह्याकिङ कसरी र कहाँबाट भयो भन्ने प्राविधिक विवरण सङ्कलन भइरहेको छ। सो फोन कलको स्रोत, लगइन समय र प्रयोग भएको डिभाइस पहिचान गर्न साइबर ब्युरो र सेवा प्रदायकसँग समन्वय भइरहेको छ।”

उनका अनुसार, हालसम्म ह्याकर कुन स्थान वा देशमा रहेको हो भन्ने यकिन हुन बाँकी छ। तर प्राविधिक ट्रेसिङ तीव्र गतिमा भइरहेको र ह्याकरको पहिचानका लागि साइबर ब्युरोसँग सहकार्यमा अनुसन्धान अघि बढाइएको उनले बताए।

व्यापारीहरूसँग रकम माग्दै ह्याकर सक्रिय

घटनापछि सुनसरीका केही व्यापारीहरूले प्रहरी प्रमुखकै नाममा रकम मागिएको म्यासेज प्राप्त गरेको बताएका छन्।

झुम्काका एक ब्यापारीले भने, “ह्वाट्सएपमा प्रहरी प्रमुखकै प्रोफाइल फोटोसहित म्यासेज आएको थियो। सुरुमा विश्वास गरेँ, तर रकम पठाउनुअघि प्रत्यक्ष सम्पर्क गर्दा ह्याक भएको थाहा पाएँ।”

प्रमुख थेबेले पनि व्यापारी तथा सर्वसाधारणहरूलाई त्यस्ता म्यासेजमा नफस्न आग्रह गर्दै भने, “कति जनाले यस्ता सन्देश प्राप्त गर्नुभयो भन्ने विवरण सङ्कलन भइरहेको छ। सबै म्यासेज र रकम मागिएको विवरणको प्रमाण सुरक्षित राख्ने कार्य भइरहेको छ।”

रु. २० हजारदेखि ६० हजारसम्म रकम मागिएको सूचना

जिल्ला प्रहरी कार्यालयका प्रवक्ता प्रहरी नायब उपरिक्षक योगराज खतिवडाका अनुसार, ह्याकरले व्यापारी र अन्य व्यक्तिहरूलाई रु.२० हजारदेखि ५०–६० हजार रुपैयाँसम्म रकम माग्ने गरेको सूचना प्राप्त भएको छ।

“कहिलेकाहीँ ‘केही समयमा फिर्ता गरिदिन्छु’ भन्ने बहानामा रकम मागिएको सन्देश प्राप्त भएको छ,” खतिवडाले बताए।

साइबर ब्युरोसँग समन्वयमा अनुसन्धान

खतिवडाका अनुसार, ह्याक भएको नम्बर र प्रयोग गरिएको डिभाइस ट्र्याक गर्न सुरु गरिएको छ।

“हामीले साइबर ब्युरोसँग प्रत्यक्ष समन्वय गरेर ह्याकरको आईपी एड्रेस, प्रयोग भएको सर्भर र सम्भावित स्थान पहिचान गर्ने कार्य अघि बढाएका छौँ,” उनले प्रदेशखबर संग भने।

प्रहरीले ह्याकिङसम्बन्धी सन्देश प्राप्त गर्ने व्यक्तिहरूसँग प्रमाण सङ्कलन गरिरहेको छ। प्रभावित व्यापारीहरूबाट प्राप्त स्क्रिनसट, म्यासेज र कल विवरणहरू सुरक्षित राख्ने कार्य जारी छ। अनुसन्धानका क्रममा सन्देश पठाउने प्रयोगकर्ताको पहिचान हुने अपेक्षा गरिएको खतिवडाको भनाइ छ।