बाजुराकी अनमी थापाले कृत्रिम श्वास दिएर शिशुको ज्यान बचाइन्

बाजुरा । बाजुराकी अनमी रमा थापाले लगातार पाँच घण्टा कृत्रिम श्वास दिएर एक शिशुको ज्यान बचाएकी छन् ।

गौमुल गाउँपालिका–१ माडीकी २९ बर्षकी निशा बोहराले जन्म दिएको शिशुको अनमी थापाले कृत्रिम श्वासको माध्यममार्फत ज्यान बचाएकी हुन् ।

निशालाई उनका आफन्तले माडी सामुदायिक स्वास्थ्य केन्द्रमा सुत्केरी गराउन लगेका थिए  । स्वास्थ्य संस्थामा पुर्‍याउँदा बच्चाको टाउको पेटमा अड्किएको थियो भने खुट्टा बाहिर निस्केका थिए । स्वास्थ्यकर्मीले हातले शिशु निकालेका हुन् ।

जन्मेको शिशु निसासिएको थियो, श्वास नै थिएन । बच्चाको मृत्यु भइसकेको भनेर छाडेका थियौ अनमी रमा थापाले बताइन् । फेरि पनि श्वास जाग्छ कि भनेर लगातार श्वास दियौ बिस्तारै बच्चाको मुटुको धड्कन चलेको अनमी थापाले बताइन् ।

‘दिउँसो पौने ४ बजे जन्मेको शिशुले रातीको करिब साढे ९ बजेतिर लगातार कृत्रिम श्वास दिएपछि बच्चाले अलि बढी श्वास फेर्न सुरु गरेको थापाको भनाइ छ ।

कृत्रिम श्वासले लामो समयपछि श्वास फेरेपछि बच्चा बाँच्ने आश जाग्यो । त्यसपछि शिशु रोएपछि फेरि पनि श्वास दिँदै गयौँ । चम्चाले दूध खुवायौ, त्यसपछि बिस्तारै बच्चाको स्वास्थ्यमा सुधार आयो,’, अनमी थापाले भनिन् ।

जोखिम अवस्था सुत्केरी पनि गराएकी निशा र बच्चाको अवस्था अहिले सामान्य छ ।  माडी सामुदायिक स्वास्थ्य संस्थामा अहिलेसम्म यातायातका साधन पुग्न सकेका छैन् । सडक सञ्जाल नपुग्दा यहाँका कयौँ आमाहरूले समस्या भोग्नुपर्ने बाध्यता रहेको छ ।

माडी सामुदायिक स्वास्थ्य इकाई विगत दुई वर्षदेखि सेवा दिँदै आइ रहेको छ । दुर्गममा स्वास्थ्य सेवाको पहुँच पुगाउन दुई बर्ष पहिला स्वास्थ्य संस्था स्थापना गरिएको थियो । गौमुलको वडा नम्बर १ बाहेक अन्य वडामा सहज यातायातको पहुँच रहेको छ तर त्यहाँ पुग्न सकेको छैन् । यातायातका साधन सञ्चालनको लागि सडक निर्माण कार्य जारी छ ।

दुर्गमका आमाहरूका पीडा, राज्य संयन्त्र मौन

जिल्लामा स्वास्थ्य संस्था टाढा हुँदा समयमै गर्भवती आमालाई स्वास्थ्य संस्था पुर्‍याउन नसक्ने अवस्था छ । तर उनीहरूको उद्धारको लागि राज्य संयन्त्रले पनि ध्यान दिएको पाइँदैन ।

विकट जिल्लाको रूपमा परिचित बाजुरा पनि यो समस्याबाट अछुत छैन् । बाजुरामा यस्ता खाले घटनाहरू कयौँ घटिरहेका हुन्छन् । जिल्लामा पाँच बर्ष यता मात्रै समयमै सुत्केरीको हवाई उद्धार नहुँदा दर्जनौँ सुत्केरी आमाहरूको मृत्यु भएको छ ।

नौ वटा स्थानीय तह भएको जिल्ला अझै पनि विकासका हिसाबले पछाडि छ । अझ भनौँ गर्भवती सुत्केरी आमाहरूले अकालमै ज्यान गुमाउनु पर्ने बाध्यता झन् विकराल छ । यहाँ गर्भवती सुत्केरी आमाहरूलाई स्वास्थ्य संस्था पुर्‍याउन घण्टौँ हिँड्नुपर्ने अवस्था छ । यातायातको सुविधा नहुँदा बिरामीलाई स्ट्रेचर वा डोकोमा हालेर अस्पताल लैजानुपर्ने बाध्यता छ । सुत्केरी आमाहरूलाई उद्धारको लागि जहाज कुर्दाकुर्दै उनीहरूको ज्यान जाने अवस्था छ ।

यहाँका आमाहरूले बाटोमै बच्चा जन्माउन बाध्य छन् । समयमै सहज उपचार पाउन सकेका छैनन् । सरकाले लागु गरेको सुत्केरी हवाई उद्धार कार्यक्रम बाजुरामा पनि प्रभावकारी बनाउन जरुरी छ । बाजुरामा अस्पताल पुग्न सुत्केरी महिलाहरूलाई हम्मे हम्मे पर्ने गरेको छ ।

उचित किसिमको बाटोघाटो,यातायातको सुविधा नहुँदा उनीहरूले पीडा भोग्नुपर्ने बाध्यता छ । समयमै अस्पताल पुर्‍याउन नसक्दा कतिपय आमाहरूले आफ्ना सन्तान गुमाएकी छन् ।