काठमाडौं : प्रतिनिधिसभा निर्वाचन नजिकिँदै गर्दा चार दशक लामो विरासत बोकेका पूर्वप्रधानमन्त्रीहरू चुनावी दौडधुपमा देखिएका छन्।
पूर्वप्रधानमन्त्रीत्रय केपी शर्मा ओली, पुष्पकमल दाहाल ‘प्रचण्ड’ र माधवकुमार नेपाल प्रत्यक्ष रूपमा चुनावी मैदानमा छन् भने डा. बाबुराम भट्टराई उम्मेदवारी फिर्ता लिएर बाहिरिएका छन्।
पूर्वप्रधानमन्त्रीहरू झलनाथ खनाल, शेरबहादुर देउवा र लोकेन्द्रबहादुर चन्द भने प्रत्यक्ष रूपमा सक्रिय देखिँदैनन्। ओली, दाहाल र नेपाल भने आफ्नो राजनीतिक विरासत जोगाउँदै दललाई बलियो बनाउन मतदातासँग भेटघाट र चुनावी कार्यक्रममै व्यस्त छन्।
पूर्वप्रधानमन्त्री तथा नेपाली कांग्रेसका निवर्तमान सभापति देउवा भने महाराजगञ्जस्थित निवासमा ‘मौन’ देखिएका छन्। खनाल डल्लुस्थित निवासमा जेनजी आन्दोलनका क्रममा जलेर घाइते भएकी श्रीमतीको स्याहारमा छन्।
उम्मेदवारी दर्ता गरेर फिर्ता लिएका भट्टराई पितृशोकमा छन् भने लोकेन्द्रबहादुर चन्द नयाँ पुस्ताको राजनीतिक अभ्यासलाई नजिकबाट हेरिरहेका छन्।
यसअघिका निर्वाचनमा अत्यन्त सक्रिय रहने देउवाको यसपटक कुनै चुनावी कार्यक्रम तय छैन। देउवाको सचिवालयले प्रतिनिधिसभा निर्वाचन केन्द्रित कुनै कार्यक्रममा सहभागी हुने तयारी नरहेको स्पष्ट पारेको छ। ‘अघिल्लो निर्वाचनमा निकै व्यस्तता थियो, तर यसपटक कुनै कार्यक्रम छैन,’ सचिवालयले जनाएको छ।
जेनजी आन्दोलनपछि गत पुसमा भएको कांग्रेस विशेष महाधिवेशनबाट गगनकुमार थापा सर्वसम्मत् सभापति चयन भएपछि देउवा शान्त देखिएका छन्। यद्यपि, कांग्रेसभित्रै देउवा रणनीति निर्माणमा जुटिरहेको दाबी गरिँदै आएको छ। उनी डडेलधुराबाट चुनाव लड्न इच्छुक भए पनि पार्टीभित्रको विवादका कारण उम्मेदवारी दर्ता हुन सकेन।
पाँचपटक प्रधानमन्त्री भइसकेका देउवा छैटौँपटक प्रधानमन्त्री बन्ने दौडमा थिए। एमाले–कांग्रेस सहमतिअनुसार प्रधानमन्त्री बन्ने सम्भावना भए पनि जेनजी आन्दोलनपछि परिस्थिति बदलियो। हाल कांग्रेसले गगन थापालाई सम्भावित प्रधानमन्त्रीका रूपमा अघि सारेको छ। थापा सर्लाही–४ बाट उम्मेदवार छन् र सय सिटभन्दा बढी जित्ने दाबी गर्दै चुनावी अभियानमा छन्।
एमाले अध्यक्ष केपी शर्मा ओली झापा–५ बाट उम्मेदवार छन्। सो क्षेत्रमा राष्ट्रिय स्वतन्त्र पार्टीका वरिष्ठ नेता बालेन्द्र शाहसँग प्रतिस्पर्धा हुने भएकाले चुनाव अत्यन्त चर्चामा छ। ओली र शाह दुवैलाई प्रधानमन्त्रीका आकांक्षीका रूपमा अघि सारिएको छ।
नेकपा संयोजक प्रचण्ड रुकुम पूर्वबाट तथा सहसंयोजक माधवकुमार नेपाल रौतहट–१ बाट उम्मेदवार छन्। गोरखा–२ बाट उम्मेदवारी दिएका भट्टराईले उम्मेदवारी फिर्ता लिएपछि त्यहाँ उनको मत कसतर्फ जाने भन्ने विषयमा अन्योल छ।
खनाल पनि कसलाई समर्थन गर्ने भन्ने द्विविधामा छन्। पत्नीको उपचार र पार्टीगत असन्तुष्टिका कारण उनी सक्रिय अभियानमा देखिएका छैनन्।
ओली र शाह दुवैलाई सम्भावित प्रधानमन्त्रीका रूपमा अघि सारिएकाले झापा–५ को प्रतिस्पर्धा देशभित्र मात्र होइन, बाहिर पनि चासोको विषय बनेको छ। आगामी निर्वाचनबाट प्रधानमन्त्रीका एक आकांक्षी हार्ने निश्चित भएकाले यो निर्वाचन विशेष चासोका साथ हेरिएको छ।
युनिकोड
मिति रूपान्तरण
पत्रपत्रिकाबाट
प्रतिक्रिया