नेपाल पत्रकार महासंघ उदयपुरको साधारणसभा सम्पन्न

नेपाल पत्रकार महासंघ शाखा उदयपुरको साधारणसभा आईतबार सम्पन्न भएको छ । सदरमुकाम गाईघाटमा आयोजित १२ औं साधरणसभा पत्रकार हकहितमा केन्द्रित हुँदै व्यवसायिक प्रतिबद्धता तथा पेशागत ऐक्यबद्धता जनाउँदै सम्पन्न भएको हो । कार्यक्रममा विद्युतीय अपराध ऐनको नाममा पत्रकारमाथि राज्य निर्मम बन्दै गएको मुद्दा उठेको थियो । स्मरण रहोस नेपाल पत्रकार महासंघका निवर्तमान सहसचिव, रेडियो नेपालका उदयुपर संवाददता नेपाल आदिवासी जनजाति पत्रकार महासंघ फोनिजका केन्द्रीय सदस्य समेत रहेका राईलाई साइबर क्राइम गरेको अभियोगमा प्रहरीले रिपोर्टिङकै क्रममा पक्राउ गरेको थियो । प्रत्रकारसँग संवद्ध बिभिन्न संघ तथा संगठनहरुले निरन्तर बिरोध गरेपछि उनी रिहा भइसकेका छन् । सोही मुद्दा कार्यक्रमको प्रमुख मुद्दा बनेको थियो । कार्यक्रममा बोल्दै पत्रकार महासंघ केन्द्रिय सदस्य अमर खड्काले पत्रकार हकहितका निम्ति आफु निरन्तर लागि परेको उल्लेख गरे । बिभिन्न शाखामा उठान भएका मुद्दाहरुलाई केन्द्रिय कार्यसमित सम्म पुर्याएर उक्त मुद्दाको समाधानको पहल नै आफ्नो प्राथमिकता भएको खड्काको भनाई थियो । अर्का केन्द्रिय सदस्य भिषण राइले पत्रकारलाई लक्षित गरी साईबरक्राईम ऐन कार्यान्वयन गर्दा निहत्था पत्रकारहरु पीडित हुनु परेको र त्यस्ता कदमको अन्त्य हुनुपर्ने उल्लेख गरे । पत्रकार महासंघ प्रदेश १ का अध्यक्ष लिला बल्लब घिमिरेले पत्रकारका मुद्दा सम्बोधन गर्नका लागि पत्रकारसम्वद्ध संघसस्थाहरुको सहकार्य अपरिहार्य रहेको उल्लेख गरे । पत्रकार महासंघ प्रदेश १ उपाध्यक्ष हेमा चाम्लिङले सञ्चार ऐन नबनेको अवस्थामा पत्रकारलाई कारबाही तथा नियमन गर्ने निकाय प्रेस काउन्सिल नेपाल भए पनि प्रहरीले काउन्सिललाई पन्छाउने गरेको स्मरण गरिन् । कार्यक्रममा बोल्दै प्रेस युनियन केन्द्रिय उपाध्यक्ष  डिल्लिराम खतिवडाले पत्रकारिता क्षेत्र संवेदनशिल भएको उल्लेख गर्दै पत्रकारलाई आइपरेका समस्यामा मल्हम लगाउन प्रेस युनियन सधै तत्पर रहेको उल्लेख गरे । उनले राज्यले गर्न नसकेका उदाहरणिय कार्यहरु आफ्नो नेत्रित्वमा प्रेस युनियनले गर्न सफल भएको स्मरण गरे । विहान १०ः०० बजेदेखि सुरु भएको साधारणसभाले पत्रकारहरुको पेशागत हक अधिकार र व्यवसायिक एकताप्रति प्रतिबद्धता जनाउँदै गाईघाट घोषणापत्र जारी गरेको छ । कार्यक्रममा शाखाले साधारणसभाका अतिथि तथा महासंघका भगिनी संघ, संगठनका प्रमुख तथा पूर्व अध्यक्षहरुलाई मायाको चिनो र कौशल चेमजोङद्वारा लिखित ‘उदयपुरको इतिहास’ नामक पुस्तक उपहार प्रदान गरेको थियो । साधारणसभामा महासंघका केन्द्रीय सदस्यद्वय भिषण राई र अमर खड्का, प्रदेश १ समिति अध्यक्ष लिलाबल्लभ घिमिरे, उपाध्यक्ष हिमा चेमजोङ, सचिव देवेन्द्र कार्की, सदस्यहरु गोपाल पोखरेल,बिज्ञापन बोर्ड सदस्य बन्दना दनुवार लगायतको आतिथ्यता रहेको थियो । महासंघका पूर्व केन्द्रीय उपाध्यक्ष वरिष्ट पत्रकार कौशल चेमजोङ, संस्थापक बद्री काफ्ले, पूर्व अध्यक्षहरु श्याम राई, इश्वर तामाङ, महेश्वर चामलिङ, सल्लाहकारहरु र साधारण सदस्यहरुको पनि कार्यक्रममा सहभागिता थियो ।